धनगढी । नेपाली कांग्रेसका नेता डा.शेखर कोइरालाले सरकार ७ बुँदे सहमति अनुसार चल्न नसकेको आरोप लगाएका छन् । शुक्रबार धनगढी विमानस्थलमा सञ्चारकर्मीसँग संक्षिप्त कुराकानी गदै उनले यस्तो आरोप लगाएका हुन् ।

उनले भने ‘जुन उदेश्यले कांग्रेस र एमालेको सरकार बनेको हो, त्यो अनुसार काम भएको छैन । अब सरकारले त्यसतर्फ ध्यान दिन आवश्यक भइसकेको छ ।’

त्यस्तै आफूले १५औं महाधिवेशनको तयारी सुरु गरि सकेको बताउँदै नेता कोइरालाले १५ औं महाधिवेशनमा आफू स्वभाविक पार्टी सभापतिको दाबेदार रहेको बताए ।

पार्टीका नेता कार्यकर्ताले कोइरालालाई धनगढी विमानस्थलमा भव्य स्वागत गरेका थिए । कोइरालाले पुस ६ गते नेपाल प्रजातान्त्रिक सेनानी संघ, सुदूरपश्चिम प्रदेशको प्रथम अधिवेशनको उद्घाटन तथा सम्बोधन गर्ने कार्यक्रम रहेको जनाइएको छ । उनीसँगै हृदयराम थानी,सुनिल शर्मालगायतका नेताहरुले प्रदेश अधिवेशनलाई सम्बोधन गर्ने जनाइएको छ ।

कोइरालाले धनगढीमा ९ वटै जिल्लाका कार्यकर्तासँग भेटघाट तथा पार्टीका विभिन्न कार्यक्रमलाई सम्बोधन गर्ने तालिका रहेको उनको निजी सचिवालयले जनाएको छ ।