धनगढी । नेपालको बाल न्याय प्रणालीलाई सुदृढ बनाउन सरोकारवालाको भूमिका विषयक १ दिने अन्तरक्रिया कार्यक्रम सोमबार धनगढीमा सम्पन्न भएको छ ।
कैलाली जिल्ला बाल न्याय समितिको आयोजना युनिसेफ नेपाल र केन्द्रीय बाल न्याय समितिको सयोगमा कार्यक्रम सम्पन्न भएको हो । केन्द्रीय बाल न्याय समितिका अध्यक्ष न्यायाधिश तिलप्रसाद श्रेष्ठले सहजीकरण गरेका थिए ।
अन्तरक्रिया कार्यक्रममा बाल न्याय सम्बन्धी अनुसन्धान तथा अभियोजनमा प्रहरी उपरिक्षक पदम बहादुर विष्ट, बाल न्याय सम्बन्धमा समाजसेवी र बालमनोविज्ञहरुको भूमिका प्रमुख समस्या र समाधानका उपायहरुमा समाजसेवी सुरेशप्रसाद अवस्थी र बाल इजलास सञ्चालन प्रमुख समस्या समाधानका उपायहरुमा जिल्ला न्यायाधिश दण्डपाणी लामिछानेले सहजीकरण गरेका थिए ।
कार्यक्रममा कैलालीका प्रमुख जिल्ला अधिकारी धर्मेन्द्रकुमार मिश्र, बालवालिका क्षेत्रमा काम गर्ने विभिन्न संघ संस्था, विभिन्न विद्यालयका सामाजिक शिक्षक, बाल क्लवका प्रतिनिधि र सरोकारवालाहरुको उपस्थिति रहेको थियो ।
कार्यक्रमका सहभागीहरुले बाल न्यायका लागि सरकारले गम्भीर भएर लाग्नु पर्ने, यस क्षेत्रमा तीनै तहका सरकारले ध्यान दिनु पर्नेमा जोड दिएका थिए ।
