धनगढी । सुदूरपश्चिम प्रदेश प्रमुख नजिर मियाँले छुवाछूत र विभेदमुक्त समाज बनाउन आवश्यक रहेको बताएका छन् । धनगढीमा आज सुरु भएको दलित सामाजिक मञ्चमा उनले विभेद र छुवाछूत अन्त्य नहुँदासम्म समाज र देशको विकास हुन नसक्ने बताए ।
दलित समुदायका लागि संविधानमा पर्याप्त अधिकारहरू दिइएको भन्दै अधिकार कार्यान्वयनमा सबै जिम्मेवार बन्न आवश्यक रहेको उनले बताए ।
‘छुवाछूत र विभेद अन्त्य नहुँदासम्म मुलुकको विकास हुन सक्दैन ’ प्रदेश प्रमुख मियाँले भने ‘छुवाछूत र विभेद अन्त्य गरेर प्रदेश र देशको विकास गर्नु तपाई हाम्रो जिम्मेवारी हो ।’
प्रदेश प्रमुख मियाँले आफू संविधानको रक्षा गर्ने जिम्मेवारीमा रहेको र संविधानमा पनि छुवाछूत मुक्त समाजको परिकल्पना गरेको बताउँदै छुवाछूत र विभेद अन्त्य गर्न पनि आफ्नो भूमिका हुने स्पष्ट पारे । उनले जात वा धर्मका नाममा गरिने विभेद कानुनी रुपमा पनि दण्डनीय रहेको बताए ।
प्रदेश सरकारका अन्तरिक मामिला तथा कानुन मन्त्री हीरा सार्कीले समाजमा पछिल्लो समय जातीय विभेद कम हुँदै गए पनि अझै अन्त्य हुन नसेकेको बताए । उनले समाजलाई विभेदमुक्त बनाउनु पर्नेमा जोड दिए । छुवाछूत दण्डनीय रहेको भन्दै त्यस्तालाई कारबाही हुने समेत उनले बताए।
सामाजिक विकास मन्त्री मेघराज खड्काले दलित अधिकार स्थापित गर्ने गरि कानुन निर्माणको तयारी भइरहेको बताए । कार्यक्रममा पूर्व मन्त्री तथा प्रदेश सभा सदस्य लक्ष्मी विक, प्रदेश सभा सदस्य ललिता सुनार लगायतले विभेद र छुवाछूत अन्त्यका लागि सबै लाग्नु पर्ने बताएका थिए ।
