धनगढी । मुक्त कमैया महिला विकास मञ्चले महिला तथा युवालाई उद्यमी बनाउन विभिन्न सीपमूलक तालिम दिन थालेको छ । गैह्र परम्परगत क्षेत्रमा महिला उद्यमशीलता विकास परियोजना अन्तरगत महिला तथा युवालाई उद्यमी बनाउन तालिम दिन लागेको हो ।
मञ्चले कैलालीको धनगढी उपमहानरपालिका र गोदावरी नगरपालिकामा परियोजना मार्फत उद्यमी बन्न चाहने महिला तथा युवालाई तालिम तथा आर्थिक सहयोग गरेको छ । परियोजना अन्तरगत गोदावरी नगरपालिका«–९ धनचौरीकी कृष्णी चौधरीले ड्राइभिङ ट्रेनिङ गरिरहेकी छन् ।
उनले धनगढी–८ अनामनगरमा रहेको गयश्वर ड्राइभिङ ट्रेनिङ सेन्टरमा तालिम लिन लागेको बताइन् । आफ्नो परिवारको आर्थिक अवस्था कमजोर भएका कारण सीप सिकेर स्वरोजगार बन्ने उदेश्यले तालिम लिन लागेको उनले बताइन् । संस्थाको सहयोगमा तालिम लिन पाउँदा आफूलाई सहज भएको उनले बताइन् ।
त्यस्तै धनगढी–१० जुगेडाका अशोक रानाले मोबाइल मर्मतको तालिम लिन थालेका छन् । यसअघि लेभल–१ को तालिम लिइसकेका उनले अहिले एड्भान्स तालिम लिदैछन् । यो तालिम प्राप्त गरेपछि आफूलाई काममा सजिलो हुने उनले बताए । मञ्चले उनलाई अहिले मोबाइल मर्मतका सामाग्री पनि उपलब्ध गराएको छ ।
धनगढी–८ का मोहित चौधरी संस्थाकै सहयोगमा आल्मुनियम पसल सञ्चालन गर्ने तयारी रहेका छन् । फेव्रिकेटरको तालिम लिएका उनले निकट भविष्यमै पसल सञ्चालनमा ल्याइने बताए ।
यसैगरी सो क्षेत्रमा शुक्रबार धनगढी उपमहानगरपालिका र मुक्त कमैया महिला विकास मञ्चले अनुगमन गरेको छ । धनगढी उपमहानगरपालिकाकी उपप्रमुख कन्दकलाकुमारी राना,प्रमुख प्रशासकीय अधिकृत नरेन्द्रबहादुर खातीलगायत संस्थाकी अध्यक्ष सीमाकुमारी चौधरी तथा कर्मचारीले अनुगमन गरेका थिए ।
त्यस्तै, संस्थाले गैह्र परम्परगत क्षेत्रमा महिला उद्यमशीलता विकास परियोजनाको सामाजिक लेखा परीक्षण गरेको छ । कार्यक्रममा परियोजनामा भएका कृयाकलापहरु,बजेट, खर्चलगायतका बारेमा जानकारी दिइएको थियो ।
