धनगढी । सुदूरपश्चिम प्रदेश सरकारले प्रदेशमा रहेका महत्वपूर्ण सडकको स्त्तरोन्नती गर्ने भएको छ । प्रदेश सरकारले प्रदेशका नौं वटै जिल्लामा पाँच हजार किलोमिटर सडक बिस्तार गर्ने भएको हो ।
धनगढीमा आयोजित एक गोष्ठीमा सुदुरपश्चिम प्रदेश सरकारको प्रादेशिक सडक संजालमा प्रदेशका नौवटै जिल्लामा पाँच हजार सडक एक सय ६६ वटा सडकको गुरुयोजना तयार गरिएको तथ्यांक प्रस्तुत गरिएको छ ।
भौतिक पूर्वाधार मन्त्री सुरेन्द्रबहादुर पालले सुदूरपश्चिममा सरकारले बनाएको गुरुयोजनाअनुसार प्रदेश लोकमार्ग र प्रदेश सहायक लोकमार्गको पहिचान गर्दै वर्गीकरण गरेर योजना बिस्तार गरिने बताए ।
मन्त्रालयले गुरुयोजनाअन्तर्गत छनौट गरेका सडक प्रदेश सरकारबाट स्वीकृत गरेर राजपत्रमा प्रकाशित गरी पाँचदेखि १० वर्षमा प्राथमिकताका आधारमा निर्माण गरिसक्नुपर्नेछ ।
नेपाली कांग्रेसका प्रदेश सभा सदस्य दिवानसिंह विष्टले गुरुयोजना निर्माणका क्रममा समेत प्रदेश सभा सदस्यको सुझाव नमागिएको भन्दै मस्यौदा प्राप्त भइसकेपछि भने अध्ययनको समय दिनुपर्ने बताए ।
कांग्रेसका प्रमुख सचेतकसमेत रहेका प्रदेश सभा सदस्य बिक्रम धामीले पनि गुरुयोजनामा जिल्लाका महत्वपूर्ण सडक छुटाइएको, मानिसको आवतजावतलाई मात्र ध्यान दिइएको देखिएकाले पुनरावलोकन गर्नुपर्ने सुझाव दिए ।
एमालेका प्रदेश सभा सदस्य धर्मराज पाठकले आवश्यकताका आधारमा सडक निर्माणको योजना बनाउनुपर्नेमा जोड दिए । पाठकले प्रदेशले बनाइरहेका वा बनाउनुपर्ने मात्र नभएर संघ सरकार अन्तरगतका सडक, तिनको अवस्था र स्थानीय तह अन्तरगतका सडकको पनि अभिलेख राख्नुपर्ने सुझाव दिए ।