धनगढी । निर्माण व्यवसायीले सरकारबाट निर्माण कार्य गरेवाफतको रकम भुक्तानी नपाउँदा निर्माण उद्योगमा विकराल अवस्था सिर्जना भएको बताएका छन् ।
सुदूरपश्चिम प्रदेश निमार्ण व्यवसायी महासंघले आज धनगढीमा गरेको पत्रकार सम्मलेनमा बोल्दै महासंघका केन्द्रीय उपाध्यक्ष प्रकाश सेठीले भुक्तानी नदिएर सरकारले निर्माण व्यवसायीलाई जर्जर अवस्थामा पु¥याएको बताए ।
उनले भने ‘हामीले तोकिएकै समयमा काम सम्पन्न गर्ने प्रयास गर्छौँ । तर सरकारले पैसा छैन् भनेर भुक्तानी लामो समयसम्म रोकिदिएको छ । निर्माण व्यवसायीलाई बैंक,मजदुर,राज्यले समातेको छ ।’
उनले भने ‘निर्माण व्यवसायीले आफ्नो जायजेथा लगानी गरिसक्यौँ । टाँट पल्टिसक्यौ । निर्माण सम्पन्न भइसक्दा पनि सरकारले भुक्तानी दिएको छैन् ।’भुक्तानीमा भएको समस्याकै कारण एक हजार ७ सय प्रोजेक्टको काम ठप्प भएको उनले बताए ।
संघ र प्रदेश सरकारले काम गरेको भुक्तानी दिने आशामा आफूहरुले भूक्तानी गर्नुपर्ने ठाउँमा चेक दिने गरेको तर समयमा भुक्तानी नहुँदा त्यही चेककै कारण जेल जानुपर्ने अवस्था आएको निर्माण व्यवसायीहरु बताउँछन् ।
साथै विस्तृत आयोजना प्रतिवेदन (डिपीआर) बिना योजनाहरुको ठेक्का लगाउने, स्रोत सुनिश्चितता बिना निर्माण सम्झौता गर्ने सरकारी कार्यशैलीका कारण त्यसको भागिदार निर्माण व्यवसायी हुनुपरेको उनीहरुको गुनासो छ ।
देशभरका निर्माण व्यवसायीहरूको प्रतिनिधित्व हुने गरी यही पुष २७ गते काठमाण्डौँमा ‘राष्ट्रिय भेला–२०८१’ आयोजना गर्न लागिएको र सोही भेलाको म्याण्डेट अनुसार आन्दोलनका चरणबद्ध कार्यक्रमहरू गरिने जनाइएको छ ।
