धनगढी । विपद् जोखिम न्यूनीकरणसम्बन्धी सूचना प्रवाह गर्न पत्रकारहरुको भूमिका महत्वपूर्ण रहेको एक कार्यक्रममा बक्ताहरुले जोड दिएका छन् ।
बिहीबारदेखि धनगढीमा आयोजित दुई दिने ‘विपद् जोखिम न्यूनीकरण तथा व्यवस्थापन र जोखिम सञ्चारमा मिडियाको भूमिका सवलीकरण’ कार्यक्रममा बोल्ने बक्ताहरुले विपद् आउनु पूर्व नै जोखिमका क्षेत्र पहिचान गरी आम समुदायलाई सजग गराउने काममा पत्रकारले कलम चलाउनपर्नेमा जोड दिए ।
सुदूरपश्चिम प्रदेशका आन्तरिक मामिला तथा कानुनमन्त्री हिरा सार्कीले सुदूरपश्चिममा विपद्को उच्च जोखिम रहेकोले जोखिम न्यूनीकरणमा पत्रकारको भूमिका महत्वपूर्ण हुने बताए ।
‘विपद् र विपद् जोखिम न्यूनीकरणसम्बन्धी समुदायलाई सजग गराउनेदेखि सरकारलाई घचघच्याउने काममा पत्रकार सधै लाग्नुपर्छ’ उनले भने विपद्बाट धन सम्पत्तिको क्षति रोक्न नसके पनि समयमै सही सूचना प्रवाह गरेर मानवीय क्षति कम गर्न सकिन्छ ।
कार्यक्रममा संविधानसभा सदस्य गंगालाल तुलाधरले लोकतन्त्रको प्राणबायु सञ्चार जगत भएकोले विपद्मा पनि पत्रकारको ठूलो भूमिका रहेको बताए । उनले विपद् आउनु पूर्व तयारीमा जुट्न सके जनधनको क्षति हुनबाट जोगिन सकिने धारणा राखे ।
विपद् जोखिम न्यूनिकरणका लागि बढ्दो प्रविधिको विकासलाई उपयोग गरेर आम समुदायलाई सहि सूचना प्रवाह गर्न आवश्यक रहेको उनले बताए ।
राष्ट्रिय विपद् न्यूनीकरण तथा व्यवस्थापन प्राधिकरणका प्रवक्ता डा. डिजन भट्टराईले विपद् जोखिम न्यूनीकरण र व्यवस्थापनबारे नागरिकलाई बुझाउने दायित्व पत्रकारको भएको बताए । विपद् जोखिम न्यूनीकरण र व्यवस्थापनका लागि बनेको नयाँ नीतिबारे सञ्चारजगतले आम जनतालाई बुझाउन आवश्यक रहेको उनले बताए ।
यसैगरी, कार्यक्रममा कैलालीका प्रमुख जिल्ला अधिकारी गोगनबहादुर हमालले विपद् जोखिम न्यूनीकरण र व्यवस्थापनमा सबै पक्ष जिम्मेवार भएर लाग्नुपर्ने बतए । उनले बेला बेलामा विपद् जोखिमका घट्ना आइरहने भएकोले पूर्व सूचना प्रणालीलाई व्यवस्थित गर्नुपर्ने धारणा राखे ।
जलतथा मौसम विज्ञान कार्यालय कोहोलपुरका प्रमुख रामप्रसाद भट्टराईले सबैका लागि पूर्व सूचना आवश्यक भएको बताए । पूर्व सूचना प्रणालीले ठूलो जनधनको क्षति हुनबाट जोगाउने भएकोले सो कुरामा पत्रकारको भूमिक रहँदै आएको उनको भनाइ थियो ।
विपद् जोखि न्यनीकरण तथा व्यवस्थापन प्राधिकरणका कार्यकारी प्रमुख डा. भीष्म भुसालले विपद् जोखिम न्यनीकरणमा सञ्चार जगतको भूमिका महत्वपूर्ण हुने बताए ।
कार्यक्रममा कान्तिपुर टेलिभिजनका डेपुटी सम्पादक रुपेश श्रेष्ठले विपद् पूर्वतयारीमा पत्रकारको भूमिका र पत्रकार जगदीश खरेलले विपद् संकटमा मानवतावादी पत्रकारिता लगायत विषयमा प्रस्तुतिकरण राखेका थिए ।
राष्ट्रिय विपद् न्यूनीकरण तथा व्यवस्थापन प्राधिकरण र आन्तरिक मामिला तथा कानुन मन्त्रलायको आयोजना तथा मर्सीकोर नेपालको प्राविधिक सहयोगमा आयोजित सवलीकरण कार्यक्रममा कैलाली, कञ्चनपुर र डडेल्धुरामा कार्यरत पत्रकारको सहभागिता रहेको थियो ।
