धनगढी । कैलालीको अत्तरियास्थित दुर्गालक्ष्मी बहुमुखी क्याम्पसमा चैत २७ गते स्वतन्त्र विद्यार्थी युनियनको निर्वाचन हुँदैछ ।
अखिल संयुक्तबाट सभापतिमा बमबहादुर विक उम्मेदवार रहेका छन् । त्यस्तै नेपाल विद्यार्थी संघबाट सभापतिमा भुवन महरा उम्मेदवार रहेका छन् । यतिखेर परिणाम आफ्नो पोल्टामा पार्न उम्मेदवारहरु लागिपरेका छन् ।
अखिल संयुक्तबाट सभापतिका उम्मेदवार रहेका विक क्याम्पसका चर्चित विद्यार्थी नेता पनि हुन् । उनी विद्यार्थी माझ लोकप्रिय नेता समेत रहेको बताइन्छ ।
विकले विगतको विरासत भत्काएर आफूले जित्ने दाबी गरे । उनले भने ‘यस पटक हामीले चुनाव जित्छौँ । हाम्रो प्यानल सहित निर्वाचन जित्ने पक्कापक्की जस्तै हो । विगतको विरासत भत्किन्छ । हाम्रो टिम राम्रो छ । सबै विद्यार्थीले मतदान गर्ने विश्वास छ ।’
विक क्याम्पसमा अहिले बिए साताैं सेमिस्टरमा अध्यनरत रहेका छन् भने स्वतन्त्र विद्यार्थी युनियनको सचिव भएर काम गरेको उनीसँग अनुभव छ ।
विक क्याम्पसमा रहेका कमजोरी सुधार्दै विद्यार्थीका हकअधिकार सुनिश्चित गर्ने, विद्यार्थीका समस्यालाई प्राथमिकताका साथ समाधान गर्ने प्रतिबद्धतासहित चुनावी मैदानमा छन् । अघिल्लो निर्वाचनमा त्यहाँ स्ववियु सभापति नेविसंघले जितेको थियो ।अखिल संयुक्तबाट सचिवमा गणेशनाथ योगी र कोषाध्यक्षमा दिपिका जोशी उम्मेदवार रहेकी छन् ।
