धनगढी । कैललीको अत्तरियास्थित दुर्गा मन्दिरमा गत चैत्र २६ गते राति भएको जगदीश कैनीको हत्याका आरोपी हेमन्त बोहरालाई प्रहरीले सार्वजनिक गरेको छ । बिहीबार इलाका प्रहरी कार्यालयले पत्रकार सम्मेलन गर्दै अभियुक्त बैतडीको डिलाशैनीका बोहरालाई सार्वजनिक गरेको हो ।

प्रहरीका अनुसार २६ गते दिउँसोदेखि नै अत्तरियास्थित शिविरमा मदिरा सेवन गरेका बोहरा रातिको समयमा मन्दिरमा सुत्न गएको र त्यही मन्दिरमा उनी आउनु पहिला कैनी सुतेका थिए ।

आरोपित बोहरा पुनः उठेर अत्तरियाका होटलमा मदिरा खोज्न गएको र त्यही क्रममा धनगढीरोड स्थित गुरुङ मम पसलमा गएको मदिरा र डिस्पोजल ग्लास खरिद गरि मन्दिरमा गएर सुतेको खुलेको छ।

रातीको समयमा उठ्दा आफ्नो ४ सय हराएको र त्यही सुतेका कैनीले चोरेको आशंकामा उनलाई ढुङ्गा प्रहार गरि हत्या भएको अभियुक्तको बयान रहेको इलाका प्रहरी कार्यालय अत्तरियाका प्रमुख डिएसपी गंगाबहादुर थापाले बताए ।

उनलाई थप अनुसन्धानका लागि जिल्ला अदालत कैलालीमा पेश गरिने जनाइएको छ । यस घटनाको अनुसन्धानमा डिएसपी थापाको नेतृत्वमा ७ सदस्यीय अनुसन्धान टोली गठन गरिएको थियो । प्रदेश प्रहरी कार्यालय, नेपाल प्रहरी सुदूरपश्चिम प्रदेश कार्यालय महेन्द्रनगरलगायतका निकाएबाट प्रहरी परिचालन गरिएको थियो ।