धनगढी । उज्यालो धनगढी अभियान अन्र्तगत धनगढीका विभिन्न स्थानहरुमा बत्ती जडान हुन थालेको छ । सोही अभियान अन्र्तगत धनगढी उपमहानगरपालिकाले स्याउले सडकका पोलहरूमा बत्ती जडानको काम सुरु गरेको छ ।
अभियान अन्तर्गत नौ सय ५४ वटा बिजुली बत्तीहरू हाल विभिन्न सडकमा रहेका पोलहरूमा जडान गरिन थालिएको धनगढी उपमहानगरपालिकाले जनाएको छ ।
धनगढी–दीपायल द्रुतमार्ग, हुलाकी राजमार्ग, राजपुल–भन्सार रिङ्ग रोड, क्याम्पस चोक–जाखोरताल सडक, बेहडाबाबा मन्दिर जाने सडकको पथरी क्षेत्रका विद्युतक पोलहरूमा बत्ती जडान गरिदै छ।
धनगढी उपमहानगरपालिकाले ‘उज्यालो धनगढी’ अभियान अन्तर्गत काम जारी रहेको बताएको छ। क्रमिक रूपमा ‘उज्यालो धनगढी’ अभियान जारी रहने उपमहानगरपालिकाले बताएको हो।
धनगढी उपमहानगरपालिका क्षेत्रका सडकहरूमा उज्यालोका लागि बत्ती जडानको काम क्रमिक रूपमा अगाडी बढ्ने बताइएको छ।
धनगढी उपमहानगरपालिकाले जनघनत्व तथा भिडभाड हुने क्षेत्रमा एक सय २० वाट क्षमताका बत्ती जडान गर्दै छ। तर, जनघनत्व काम भएको क्षेत्रमा ५० वाट क्षमताका बत्तिसमेत जडान गरिने छ। धनगढी उपमहानगरपालिकाले ४४ लाख बढीको लागतमा ठेक्का मार्फत बत्ती जडानको काम थालेको हो।
धनगढी उपमहानगरपालिकाले अत्तरिया–धनगढी ६ लेन सडक, धनगढीको चौराहदेखि कैलाली पुलसम्मको मुख्य सडकसहित सहरी विकासले निर्माण गरेका ७ वटा सडकहरूमा समेत विद्युतीकरणको काम गरेको थियो। धनगढीका मुख्य–मुख्य बजार तथा चोकहरूमा हाइमास्क लाइटहरू पनि जडान गरिएका छन्।
