धनगढी । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाले दुर्घटना न्युनिकरण गर्नका लागि सचेतनाका कार्यक्रमलाई जोड दिन थालेको छ ।
कार्यालयले चालकसँग १ मिनेट कार्यक्रम ३ हजार ९२३ पटक आयोजना गरेको छ । त्यस्तै स्कुल सम्पर्क कायक्रम एक सय पचास पटक र अभिभावकसँग ट्राफिक प्रहरी,मापसे तथा लेन अनुशासन सम्बन्धी जनचेतनामुलक कक्षा सञ्चालन १५८ पटक गरेको कार्यालयका सूचना अधिकारी एवं प्रहरी नायव उपरीक्षक टेकबहादुर जोराले निशाना न्युजलाई जानकारी दिए ।
पहाडी रुटमा टाइमकार्ड कडा रुपमा लागु गरिएको उनले बताए । उनले सार्वजनिक यात्रुबाहक बसहरुमा २ जना चालक भए नभएको टिसीए एपीपी मार्फत चेकजाँचलाई निरन्तरता दिएको तथा गत चैत १३ गतेदेखि टेक्टर बहस कार्यक्रम सञ्चालन गरेको उनले बताए ।
चालु आवको चैत मसान्तसम्म २ करोड ९८ लाख २६ हजार राजस्व संकलन
कार्यालयले चालु आवको चैत मसान्तसम्म ४१ हजार ६ सय ८४ सवारी साधन कारबाही गरी २ करोड ९८ लाख २६ हजार राजस्व संकलन गरेको छ ।
आव २०७९ । ८० मा १ लाख १२ हजार ६५५ सवारी साधन कारबाहीमा परेका थिए जस्बाट ६ करोड ४३ लाख ७२ हजार राजस्व संकलन भएको र गत आव २०८०\८१ मा ७३ हजार ४७९ सवारी साधन कारबाही हुँदा ४ करोड ८९ लाख ८७ हजार राजस्व संकलन गरिएको सुचना अधिकारी जोराले जानकारी दिए ।
त्यस्तै,चालु आवका चैत मसान्तसम्म ७ सय ३३ सवारी दुर्घटना हुँदा १ सय ४१ जनाको मृत्यु भएको उनले बताए । आव २०७९\८० मा २ सय ५२ सवारी दुर्घटना हुँदा १ सय ७७ जनाको मृत्यु भएको र गत आव २०८०\८१ मा ३ सय ९ सवारी दुर्घटना हुँदा १ सय ७२ जनाको मृत्यु भएको उनले जानकारी दिए ।
