धनगढी । नेकपा माओवादी केन्द्रले झापाबाट सुरु गरेको तराइ-मधेस जागरण कञ्चनपुर पुगेको छ । हुलाकी राजमार्ग केन्द्रित अभियान टोली मंगलबार त्यहाँ पुगेको हो । गत फागुन १२ गते झापाबाट सुरु भएको अभियान आज कञ्चनपुरमा समापन हुँदै छ ।
अभियानमा माओवादी केन्द्रका अध्यक्ष पुष्पकमल दाहाल ‘प्रचण्ड’ सहितको केन्द्रीय पदाधिकारीलगायतको टोली रहेको छ ।
आज कञ्चनपुरका विभिन्न स्थानमा जनभेटघाट,सहिद बेपत्ता परिवार भेटघाट,अन्तरक्रियालगायतका कार्यक्रम सम्पन्न गरि अभियानको समापन गरिने माओवादी केन्द्रका सुदूरपश्चिम प्रदेश सचिव जनक बुढाले जानकारी दिए ।
आज बिहान ७ देखि ८ बजेसम्म पुनर्वास नगरपालिका-२ मोतिबस्तीस्थित सहिद स्मृति सभा हलमा सहिद परिवार भेटघाट,साढे ९ देखि १० बजे बेलौरी नगरपालिका- ५ स्थित रामनगर खानेपानी उद्घाटन,सहिद सालिक माल्यार्पण तथा सोभाताल अवलोकन र १०:१५ बजेदेखि ११ बजेसम्म बेलौरी नगरपालिकाको सभा हलमा स्वागत तथा अन्तरक्रिया कार्यक्रम रहेको सचिव बुढाले जानकारी दिए ।
त्यस्तै, दिउँसो १ बजेदेखि साढे १ बजेसम्म बेलडाँडी गाउँपालिकाको चौवन्नी बजारमा भेटघाट र २ देखि साढे २ बजेसम्म बेदकोट सामादैजी हुलाकीमार्ग पश्चिम प्रवेशद्वारमा अवलोकन,सहिद परिवार भेटघाट गर्ने कार्यक्रम रहेको उनले बताए ।
त्यसपछि साढे ३ बजेदेखि ५ बजेसम्म भीमदत्त नगरपालिका-४ स्मारक चोकमा अभियान समापन कार्यक्रम रहेको सचिव बुढाले जानकारी दिए ।
सोमबार कैलाली आइपुगेको अभियान मंगलबार विभिन्न स्थानमा कार्यक्रम गरि साँझ कञ्चनपुर प्रवेश गरेको थियो ।
