धनगढी । नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले माओवादीद्वारा सञ्चालित तराई–मधेस जागरण अभियानबाट अपेक्षा गरेको भन्दा बढी उपलब्धी भएको बताएका छन् । आज कञ्चनपुर महेन्द्रनगरमा आयोजित अभियान समापन कार्यक्रममा बोल्दै उनले जनताको साथ सोचेभन्दा बढी प्राप्त भएको बताए ।
उनले भने ‘हामीले अभियानमा सोचेभन्दा बढी साथ पाएका छौँ । अन्य राजनीतिक दलका जनप्रनिधिले पनि हामीलाई स्वागत सत्कार गरे । यो अभियानले देशमा केही हुन्छ कि भन्न उहाँहरुमा आशा जागेको पाइयो । अभियान माओवादीको मात्रै नभएर राष्ट्रिय अभियान बन्यो ।’
अभियानले अभूतपूर्व राष्ट्रिय एकताको आधार तयार पारेको बताउँदै उनले सबै नेपालीका लागि अभियान गर्वको कुरा बनेको बताए । उनले जागरण अभियान सफलतापूर्वक सम्पन्न भएको बताउँदै तराई–मधेसका जनताबाट निकै ठूलो साथ पाइएको बताए ।
उनले भने ‘हामी जनतासँगै बस्यौँ । उहाँहरुसँगै खायौ । जनताका समस्या पीडा सुन्ने प्रयास ग¥यौँ । सहिद,बेपत्ता परिवारसँगको सम्बन्ध घनिष्ट बनाउने र उहाँहरुका पीडा सुन्ने प्रयास ग¥यौँ । अभियान समग्रमा सोचेभन्दा बढी सफल भएको छ ।’
कार्यक्रममा बोल्दै अध्यक्ष दाहालले आफ्नो नेतृत्वको सरकारले सुशासन,सामाजिक न्यायका पक्षमा काम गर्दा दलाल विचौलियालाई मन नपरेर सरकारबाट हटाउने काम भएको उल्लेख गरे ।
उनले भने ‘हामीले सरकारमा हुँदा राम्रा काम गर्न खोजेका थियौँ । दलाल विचौलियालाई मन परेन । हामीलाई बाहिर जान बाध्य पारियो ।’
अध्यक्ष दाहालले अभियान सफल बनाउन सहयोग गर्ने सबैलाई धन्यवाद ज्ञापन गरे । उनले भने ‘हामीलाई बसाई,खानपिन,सुरक्षामा नजिकबाट सहयोग गर्नुभएकोमा म सम्पूर्ण तराई–मधेसबासी जनसमुदायप्रति आभार प्रकट गर्दै र धन्यवाद दिन चाहान्छु ।’
हुलाकी राजमार्ग केन्द्रित तराई–मधेस जागरण अभियान गत फागुन १२ गते झापाबाट सुरु भएको थियो ।
