धनगढी– आसन्न स्थानीय तहको निर्वाचन अन्तर्गत कैलालीको धनगढी उपमहानगरपालिकाको उपमेयर वडाध्यक्ष र सदस्यमा उम्मेदवारी दिएका ६ जनाको उम्मेदवारी रद्द भएको छ । धनगढीको उपप्रमुखमा उम्मेदवारी दिएकी नेपाल परिवार दलकी विष्णुकुमारी विकको उम्मेदवारी रद्द भएको छ ।

पार्टीको समानुपातिक बन्द सूचीमा नाम समावेश भएकाले उनको उम्मेदवारी रद्द भएको मुख्य निर्वाचन अधिकृत जयानन्द पनेरुले जानकारी दिए । यसैगरी वडा नं ६ को वडाध्यक्षमा उम्मेदवारी दिएका नेकपा एकीकृत समाजवादीका दिलीपराज भण्डारी,
धनगढी वडा नं ५ बाट नेकपा (माओवादी केन्द्र) को तर्फबाट दलित महिला सदस्यमा उम्मेदवारी दिएकी लक्ष्मी उखेडा, वडा नं ४ बाट महिला सदस्यमा उम्मेदवारी दिएकी नेकपा (एकीकृत समाजवादी) की पार्वतीदेवी भाट को उम्मेदवारी रद्द भएको मुख्य निर्वाचन अधिकृत पनेरुले जानकारी दिए ।

यस्तै वडा नं ६ बाट राप्रपाको तर्फबाट वडा सदस्यमा उम्मेदवारी दिएका सूर्यलाल डगौँरा, वडा नम्बर ७ को सदस्यमा नागरिक उन्मुक्ति पार्टीको तर्फबाट उम्मेदवारी दिएका झगरु राना र वडा नं १९ बाट नेपाली कांग्रेसको तर्फबाट दलित महिला सदस्यमा उम्मेदवारी दिएकी देवी स्नेहीको समेत उम्मेदवारी रद्द भएको छ ।

धनगढी उपमहानगरपालिकाको प्रमुखमा नेपाली कांग्रेसका नृपबहादुर वड, नेकपा (एमाले) का रणबहादुर चन्द, राष्ट्रिय जनमोर्चाका अञ्जना श्रेष्ठ, जनता समाजवादी पार्टीका कवीन्द्र ऐर, नागरिक उन्मुक्ति पार्टीका नीमकुमार चौधरी, लोकतान्त्रिक समाजवादीका वसन्तबहादुर विश्वकर्मा र सचेत पार्टी नेपालका भारती थापा उम्मेदवार छन् । यस्तै स्वतन्त्रबाट प्रमुखमा उम्मेदवारी दिनेमा गोपाल हमाल, उद्धवराज पन्त र मदनकृष्ण भट्ट छन् ।

उपप्रमुखमा माओवादीकी शान्तिकुमारी अधिकारी क्षेत्री, एमालेकी कन्दकला रानाथारु, विवेकशील साझा पार्टीकी विमला पन्त, नागरिक उन्मुक्ति पार्टीकी सावित्रीदेवी चौधरी, राप्रपाका दुर्गादत्त पन्त र स्वतन्त्र प्रभाकर भण्डारी छन् ।