धनगढी- धनगढी बसपार्क नजिक एक घरमा चोरी भएको छ। धनगढी उपमहानगर पालिका–४ बसपार्क पछाडि रहेको एक घरमा दिउँसै चोरी भएको हो।

बसपार्क पछाडि सुरेन्द्र भट्टको घरबाट साढे चार लाख रुपैयाँ र दुई तोला ६ ग्राम सुन चोरी भएको प्रहरीले जनाएको छ। उत्तर बेहडीस्थित घरमा कोही नभएको मौका छोपी आइतबार दिउँसो करिब ११ बजेदेखि दुई बजेको बिचमा चोरी भएको हो।

घरको मूल ढोकामा रहेको ताला फोडेर घरभित्र पसेको चोरहरूको गिरोहले दराज फोडेर सुन र नगद रुपैयाँ चोरेर लगेको प्रहरीले जनाएको छ। उनीहरूले दराज र ताला फोड्न प्रयोग गरेको पेच कस र फलामको रड कोठाभित्र बेडमा छोडेर गएको समेत फेला परेको छ।