कञ्चनपुर- कञ्चनपुरमा अबिरल वर्षाले नदी नालाका सतह बढिरहेका छन् । वर्षातका कारण नदी,खोलाको सतह बढेपछि नदी गाउँ पसिरहेको छ । दोदा नदी पुनर्वास नगरपालिका ५ सिमरी गाउँमा परेको छ भने मोहना नदी कृष्णपुर नगरपालिका ७ शान्तिगाउँमा पसेको छ ।

मंगलबार बिहानैदेखि सिमरी र शान्तिपुर गाउँ डुवानमा परेको छ । जिल्ला प्रहरी कार्यालय कञ्चनपुरका प्रहरी प्रवक्ता प्रकास डाँगीले सिमरी गाउँमा झण्डै ६० धरधुरी र शान्तिपुर टोलमा समेत ६० देखिमाथि घरधुरी डुवानमा रहेको बताए ।

शान्तिपुरमा प्रहरी नायब निरीक्षक गणेश बोहरा नेतृत्वमा उद्दार टोली खटिएको र सिमरीमा प्रहरी नायब निरीक्षक राम प्रशाद अवस्थीको टोली खटिएको छ । डुवान भएपनि मानवीय तथा भौतिक क्षति नभएको प्रवक्ता डाँगीले बताए ।

अविरल वर्षातका कारण चुरे भएर बग्ने अन्य खोला नालामा पानीको सतह वृद्धि भएर कटानी तथा डुवान गरिरहेको छ । स्थानीय मुकेश धामी९कविन्द्र०ले चुरे भएर बग्ने धारापानी बछेला खोलाले कृष्णपुर नगरपालिका पुतलीबजार शान्ति टोलमा रहेको तटबन्ध भत्काएपछि दोमिल्लाका सयौँ घर जोखिममा रहेको बताए ।

‘कमसल खालको निर्माण गरिएको तटबन्ध भत्कियो, ‘उनले भने, ‘नदी गाउँ पसिरहेको छ ।’ महाकाली र जगबुढा नदीको मिलन बिन्दु क्षेत्र कुतियाकबरमा नियमित कटानी भइरहेको छ । स्थानीय टेक बहादुर सुनारले दुवै ठुला नदीले दोधाराचाँदनी नपा १० सीमावर्ती गाउँ कुतियाकरको उर्बराभूमि कटानी गरेर बस्ती जोखिममा पारिरहेको बताए । निर्माण भएको अस्थायी तटबन्ध समेत भत्काएर नदी बस्ती नजिकै पुग्ने जोखिम रहेको बताए ।

चुरे भएर बग्ने चौधर नदीले बेदकोट नपा ४पार्की टोलमा रहेको तटबन्ध भत्काएर कटानी गरिरहेको छ । स्थानीय युवा राजुराम सार्कीले चुरेमा बगुन नदीले लिंगासहितका संरचना भत्काइरहेको र दक्षिणमा महाकाली तेस्रो चरणले निर्माण गरिरहेको तटबन्ध भत्काएर गाउँमा कटानी गरिरहेको बताए ।

‘बिना गुरु योजना एव कमसल खालका समाग्री प्रयोग गरेर निर्माण गरिएको तटबन्धदेखिका संरचना समान्य नदीमा पानीको सतह वृद्धि हुँदा भत्काइरहेको छ, ‘उनले भने, ‘तटबन्धका नाममा राज्यको लाखौँ खर्च तर जनता सुरक्षित छैनन ।’

शुक्लाफाँटा नगरका युवा नेता तिलक जप्रेलले धारापानी नदीले शुक्लाफाँटा नगरपालिका ८ पिल्लरीफाँटा, बेलडाँडी गाउँमा कटानी गरिरहेको बताए । ‘गाउँबस्ती जोगाउने स्थानीय सरकार न तटबन्ध गरिदियो, न पहल गरिदियो, ‘उनले भने, ‘नदी नियन्त्रणका लागि तटबन्ध नभएपछि नदी गाउँ पसेको छ ।’

उनका अनुसार नदीको सतह बढेर पिल्लरीका कालु चौधरी र भैरब जप्रेलको दुई गोरु बगाएर लगेको बताए । अबिरल वर्षातका कारण बेलडाँडी १ र बेलौरी ९ भएर बग्ने झर्नाखोलाले समेत उर्बराभूमि कटानी गरिरहेको छ ।