धनगढी– अत्तरिया ६ लेन सडकमा तीनवटा पुल निर्माणको काम अलपत्र परेको छ । निर्माणाधीन तीनमध्ये दुईवटा पुल सम्झौताअनुसार आगामी वैशाखमा सम्पन्न गर्नुपर्ने हो । तर, पुलको प्रगति निशाराजनक छ ।
गोदावरी नगरपालिकाअन्तर्गत सुनिखोलामा निर्माणाधीन पुलको दुईपटक थप गरिएको समयावधि गत १३ असार सकिएको छ । हालसम्म पुलको भौतिक प्रगति ६५ प्रतिशत मात्र रहेको महाकाली पुल आयोजना कार्यालयले जनाएको छ । कार्यालयका इन्जिनियर सन्तोष चन्दले दुईपटक म्याद थप गरिएको अवधिमा काम पूरा नभएपछि तेस्रोपटक म्याद थपको प्रक्रियामा रहेको जानकारी दिए ।
पहुँच मार्ग, नदी नियन्त्रण, पुलको रेलिङलगायतका काम बाँकी रहेको उनले बताए । ‘यो पुलमा ६५ प्रतिशतजति काम भएको छ, वित्तीय प्रगति पनि त्यही हाराहारीमा छ,’ चन्दले भने, ‘दुईपटक म्याद थप हुँदा पनि कामले गति लिएन ।’ सुदूरपश्चिममा हुलाकी राजमार्गलगायत कैयौँ योजना अलपत्र पारेको राजेन्द्र निर्माण सेवाले यो पुल निर्माण गरिरहेको छ ।
तीन करोड ३७ लाख लागतको सुनिखोला पुल २४ मिटर लम्बाइ र ११ मिटर चौडाइको हुनेछ । गोदावरी नगरपालिकाअन्तर्गत नै मनहरा खोलामा निर्माणाधीन पुलको काम पनि करिब दुई वर्षदेखि अलपत्रजस्तै छ । आयोजना कार्यालयका अनुसार दुई वर्षसम्म पुलको काम १५ प्रतिशतभन्दा कम भएको छ ।
कोरोना, मूल्य वृद्धिलगायत बहानामा निर्माण कम्पनीले काम नगरेको हो । नयाँ पुलको पाइला हाल्दा पुरानो पुलमा समस्या देखिएपछि केही समय काम प्रभावित भएको उनले बताए । ६२ मिटर लामो यो पुलको २७ महिनाको निर्माण अवधि आगामी भदौमा सकिने इन्जिनियर चन्दले जानकारी दिए । उच्चाकोटी–समीदेव–साजेन्द्र जेभीले पुल निर्माणको काम गरिरहेको छ ।
६ लेन सडकअन्तर्गत नै धनगढीदेखि गौरीफन्टा नाका जोड्ने मोहना नदीमा पुल निर्माणका लागि ०७८ माघमा रायमाझी कन्सट्रक्सनसँग निर्माण सम्झौता भएको थियो । सम्झौताअनुसार आगामी वैशाखसम्म मोहना नदीमा एक सय २५ मिटर लामो पुल निर्माण हुनुपर्ने हो । तर, यो पुलको ‘पाइल’ राख्ने काम पनि भएको छैन ।
५० वटामध्ये ४० वटा पाइल राख्ने काम बर्खाअघि सकिएको आयोजना कार्यालयले जनाएको छ । बर्खा लागेसँगै तीनवटै पुलको काम ठप्प छ । मोहनामा निर्माणाधीन पुलको भौतिक प्रगति २० प्रतिशत मात्र रहेको इन्जिनियर चन्दले बताए । हालसम्मको प्रगति हेर्दा वैशाखमा पुल निर्माणको काम पूरा हुने नदेखिएको उनले बताए । मोहनामा बन्ने पुलको लागत १३ करोड १७ लाख रुपैयाँ रहेको चन्दले जानकारी दिए ।
तीनवटै ठाउँमा यसअघि रहेका पुलसँगै नयाँ पुल निर्माण गरेर ६ लेन बनाउन लागिएको हो । नयाँ पुलको चौडाइ ११ मिटर रहनेछ । अन्य अवरोध नभई कोरोना, मूल्यवृद्धिलगायत कारण देखाएर ठेकेदारले काम नगरेको महाकाली पुल आयोजना कार्यालयले जनाएको छ । धनगढीको मोहना पुलदेखि अत्तरियासम्म ६ लेन सडक यसअघि नै बनेको छ ।
तर, हस्तान्तरण नहुँदै ६ लेन सडक केही ठाउँमा सडक भाँसेको, चर्केको र फुटेको छ । भत्किएपछि केही ठाउँमा मर्मत गरिएको छ भने केही ठाउँमा उस्तै छ । सडक कालोपत्रे भए पनि रेलिङ राख्ने, ट्राफिक संकेतहरू बनाउने काम भने अझै पूरा भएको छैन । आगामी असोजमा सडक हस्तान्तरण गरिने बताइएको छ । १४।२ किलोमिटर लामो यो सडकलाई तीनवटा खण्डमा छुट्याएर छुट्टाछुट्टै ठेक्कामार्फत काम भएको थियो । नयाँपत्रिकाबाट
