काठमाडौं- नेपाली कांग्रेसका सांसद वीरबहादुर बलायरले सांसद डा. सुनील शर्मालाई कसैको उक्साहटमा नबोल्न सुझाव दिएका छन् ।आइतबारको संसदीय दलको बैठकमा बोल्दै उनले अर्थमन्त्री तथा पार्टी प्रवक्ता प्रकाशशरण महतको बचाउमा धारणा राखे । बलायरले शर्माले प्रमाण लिएर आए एजेन्डा बोकेर हिँड्ने धारणा राखेको एक सांसदले बताए ।
“अर्थमन्त्रीलाई लगाएको आरोप प्रमाणसहित आउनु, म तपाईंसँग तपाईँको एजेन्डा बोकेर हिँड्छु । तर अरुको उक्साहटमा नबोल्नू । संसदीय मूल्य मान्यता मान्नु पर्दैन ?,” बलायरको प्रश्न थियो । बलायरले शर्माले मिडियामा दिएको अभिव्यक्ति किमार्थ मान्य नभएको धारणा राखेको ती सांसदले बताए ।
“तपाईँले सामाजिक सञ्जालमा, मिडियामा जुन ढंगबाट बोल्नुभएको छ, त्यो किमार्थ मान्य छैन । बलायरको भनाइ उद्धृत गर्दै ती सांसदले भने, “कांग्रेसलाई प्रमुख विन्दुमा राखेर बोल्नुहोला ।” तर, बलायरले अर्थ मन्त्रालयको काम चित्तबुझ्दो भने नभएको जिकिर गरेको ती सांसदले जानकारी दिए ।
