बैतडी- बैतडीको पाटन नगरपालिका–८, खोड्पेका कृष्ण विष्ट र कलावती भण्डारी विष्टले ४० रोपनी क्षेत्रफलमा लगाएको करिब दुई सय क्विन्टल बन्दा बारीमै कुहिएको छ। बजारीकरण तथा ढुवानीको समस्याका कारण बन्दा बारीमा कुहिएको हो।

पेसाले शिक्षकसमेत रहनुभएका विष्ट दम्पती स्थानीय ज्ञानेश्वर माध्यमिक विद्यालयमा पठनपाठन गराउनुहुन्छ। शिक्षण पेसाबाट बचेको समय सदुपयोग गर्दै बाँझो जमिनमा तरकारी खेती गर्दै आएका छन् । स्थानीय बन्दाले बजार नपाउँदा चार लाख रुपियाँ घाटा भएको विष्टले बताए । आलुबाट भने राम्रो फाइदा हुने गरेको छ। बजारमा १० रुपियाँ किलोका दरले समेत बन्दा बिक्री नहुँदा बारीमै कुहिएको हो।

त्यस्तै जङ्गली बँदेल, दुम्सी र बाँदरले समेत बन्दा खाइदिँदा समस्या भएको छ। लगातारको वर्षाका कारण सडक अवरुद्ध भएसँगै ढुवानी गर्नसमेत समस्या भएको विष्टले बताए । मजदुरले बोकेर बजारमा ल्याए पनि १० रुपियाँ किलोमा पनि बिक्री नभएपछि दुई सय क्विन्टल बन्दा बारीमै छाडेको उनले बताए ।

खोड्पे क्षेत्र आलु उत्पादनका लागि प्रसिद्ध ठाउँ मानिन्छ। यहाँको मुख्य नगदे बालीका रूपमा आलु खेती हुने गरेको छ। बन्दा खेतीबाट पनि राम्रो आम्दानी हुने गरेकामा यो वर्ष मूल्य नपाउँदा समस्या भएको विष्ट दम्पतीले पीडा सुनाए ।

न्यु एसके कृषि पशु बहुउद्देश्यीय फार्म दर्ता गरेर उहाँहरूले व्यावसायिक तरकारी खेती सुरु गर्नुभएको हो। खोड्पे क्षेत्रबाट वार्षिक २३ लाख रुपियाँभन्दा बढीको बन्दा बिक्री हुने गरेकामा यो वर्ष बन्दाले बजार नपाउँदा किसानलाई घाटा भएको स्थानीय किसान गोपालसिंह विष्टले बताए । गोरखापत्रबाट