कैलाली- अछामको पञ्चदेव विनायकका विनोद शाहीको हत्या आरोपमा पक्राउ परेका सज्जन बहादुर शाहीलाई धरौटीमा रिहा गर्न आदेश दिएपछि अछाममा आन्दोलन सुरु भएको छ । लामो समयदेखि फरार रहेका सज्जन बहादुर शाहीलाई राष्ट्रिय युवा संघका नेता कार्यकर्ताहरुले साउन २२ गते काठमाडौँबाट नियन्त्रणमा लिएर प्रहरीलाई बुझाएका थिए ।

अछामको पञ्चदेवल विनायक नगरपालिका-४ का १५ वर्षीय विनोद २०७९ जेठ २१ गते मृत अवस्थामा भेटिएका थिए । यो घटनाका मुख्य योजनाकारको रूपमा आरोप लाग्दै आएका सज्जन लामो समयदेखि काठमाडौँमा लुकिछिपी बसेका थिए । तर, पीडित परिवारले भने नेता र प्रहरीकै संरक्षणमा उनी पक्राउ नपरेको आरोप लगाउँदै आएका थिए ।

एक वर्षसम्म पनि प्रहरीले पक्राउ नगरेको र पक्राउ गरेर प्रहरीलाई बुझाए लगत्तै जिल्ला अदालतले आइतबार पाँच लाख धरौटीमा छाडेपछि सोमबार विरोध प्रदर्शन भएको हो । राष्ट्रिय युवा संघ नेपालका केन्द्रीय सदस्य तथा अछाम इन्चार्ज भरत शाहले शाहीको हत्याका मुख्य योजनाकारलाई अदालतले धरौटीमा छाडेपछि आन्दोलनमा उत्रिनु परेको बताए ।

‘प्रहरी प्रशासनले यस अघि पनि उहाँलाई पक्राउ गर्नै खोजेको थिएन । हामीले नियन्त्रणमा लिएर प्रहरीलाई बुझाएका थियौँ’ उनले भने ‘त्यसपछि पछि अदालतमा सेटिङ गरेर अहिले उन्मुक्ति दिएको दिइएको छ त्यसको विरोधमा हामी छौँ । हामी निरन्तर आन्दोलनमा जान्छौँ ।’

शाहीको हत्या गरिएको भन्दै पञ्चदेवल विनायक नगरपालिकाकी मेयर अम्बिका चलाउनेसहितका १३ जनाविरुद्ध किटानी जाहेरी परेको थियो । सरकारी वकिलको कार्यालयले मेयर चलाउनेसहितका तीन जनाविरुद्ध प्रमाण नपुग्ने भन्दै मुद्दा नचलाउने निर्णय गरेको थियो । १० जनाविरुद्ध मुद्दा चलाइएकोमा अदालतले गत असारमा पाँच जनालाई पुर्पक्षका लागि कारागार चलान गरेको थियो भने चार जना अझै फरार छन् ।

अभियोग पत्र माग दाबी अनुसारको कसूरमा उनी निर्दोष हुन भन्ने आधार नभए प्रमाण नभए पनि थुनामै राखेर मुद्दा चलाउन वृद्ध र बिरामी समेत भएका कारण मनासिव नदेखिएको आदेशमा उल्लेख छ । पछि प्रमाण बुझ्दै जाँदा ठहरे बमोजिम हुने आदेशमा भनिएको छ । अहिले अदालतले रिहा गरेपछि पीडित आफन्तले भने पनि सेटिङमा फैसला भएको आरोप लगाएका छन् ।

‘सबै प्रमाण र बयानका आधारमा उहाँ नै मुख्य योजनाकार हो भन्ने पुष्टि भइसकेको छ तर, सत्ता र शक्तिको दुरुपयोग गरेर धरौटीमा रिहा गरिएको छ हामी त्यसको विरुद्धमा छौँ’, मृतक विनोदका दाजु बखत शाहीले बताए ।

आइतबार धरौटीमा रिहा भएका शाहीविरुद्ध द्वन्द्वका बेला माओवादी कार्यकर्ता सूर्यबहादुर शाहीको हत्याको पनि आरोप लाग्ने गरेको छ । उनकै योजनामा सूर्यलाई बोरामा हालेर कर्णाली नदीमा फालेको आफन्त बताउँछन् । शाही पञ्चदेवल विनायक नगरपालिका–४ निवर्तमान वडाध्यक्ष हुन् । उनी कांग्रेसका नगर सभापति तथा पूर्व शिक्षकसमेत हुन् ।