धनगढी- धनगढी उपमहानगरपालिका–१, लक्ष्मीनगरमा रहेको शिलादेवी कृषि सहकारी संस्थाको शनिबार नवौं वार्षिक साधारण सभा भएको छ ।
साधारण सभाको धनगढी उपमहानगरपालिका वडा नम्बर ८ का वडाध्यक्ष जुगराम चौधरीले उद्घाटन गरेका थिए ।
२०७१ सालमा स्थापना भएको शिलादेवी कृषि सहकारी संस्थामा हाल दुई सय ६० जना सेयर सदस्य रहेका छन् । कार्यक्रममा संस्थाको वार्षिक प्रतिवेदन प्रस्तुत गरेका संस्थाका अध्यक्ष बालकृष्ण श्रेष्ठका अनुसार पुस २७ गतेसम्म संस्थाको सेयर पुँजी ३६ लाख ३८ हजार रुपैयाँ रहेको छ ।
त्यस्तै यो अवधिसम्म निक्षेप एक करोड ४४ लाख ९५ हजार ६७६ रुपैयाँ तथा ऋण लगानी एक करोड ५६ लाख २७ हजार ८८४ रुपैयाँ रहेको छ । हाल संस्थामा २१ लाख ४२ हजार ९३७ रुपैयाँ रहेको छ ।
साधारण सभा उद्घाटन कार्यक्रममा राष्ट्रिय सहकारी बैंक, सुदूरपश्चिम प्रदेश कार्यालय प्रमुख दिनेश गेलालले कृषि सहकारी संस्थाहरुको उत्थानका लागि बैंक सहयोग गर्न तत्पर रहेको बताए । उनले भने निश्चित रुपमा कृषि सहकारी संस्था विशेष प्रकृतिको हुन्छ र चुनौतिपूर्ण पनि । त्यसैले यस्ता संस्था सफल बनाउन सेयर सदस्य तथा सञ्चालकहरुको बढी सक्रियता आवश्यक हुन्छ ।
कार्यक्रममा संस्थाका संस्थापक सेयर सदस्य निराजन श्रेष्ठले पछिल्ला केही वर्षयता कृषि सहकारी संस्थाले विभिन्न कठिनाई र समस्या बेहोर्नु परेको चर्चा गरे । उनले कृषि वीउविजन, रसायनिक मल तथा कृषि उपकरण प्राप्त गर्न समेत निकै समस्या भोग्नुपर्ने अवस्था रहेको बताए ।
शिलादेवी सहकारीले चालू आर्थिक वर्ष ०८०÷०८१ मा सेयर पुँजी ६० लाख रुपैयाँ पुराउने, कृषि कार्यमा थप लगानी गर्नका लागि आवश्यक पर्ने रकम राष्ट्रिय सहकारी बैंक तथा अन्य वित्तीय संस्थाबाट कर्जाका रुपमा प्राप्त गर्न पहल गर्ने कार्ययोजना बनाएको छ ।
त्यस्तै, अनाथ आश्रम, बृद्धाश्रम, अस्पतालहरुमा सामाजिक सेवा कार्य सञ्चालन गरिने, शिलादेवी कृषि सहकारी सुपथ मुल्य पसल सञ्चालन गर्ने, संस्थालाई थप चुस्तदुरुस्त बनाउन पहल गर्ने लगायतका कार्ययोजना अघि सारेको छ ।
साधारण सभा उद्घाटन कार्यक्रम संस्थाका अध्यक्ष बालकृष्ण श्रेष्ठको अध्यक्षतामा भएको थियो । संस्थाका संस्थापक शेयर सदस्य निराजन श्रेष्ठले सञ्चालन गरेको उद्घाटन कार्यक्रममा नेपाल प्रेस युनियनका प्रदेश अध्यक्ष मनमोहन स्वार, संस्थाका उपाध्यक्ष दिलिप श्रेष्ठ लगायतले मन्तव्य व्यक्त गरेका थिए ।
