कैलाली– कैलालीको कैलारी गाँउपालिका हसुलियामा चालु आर्थिक वर्षमा ७६ जनाले रोजगारी पाएका छन । प्रधानमन्त्री स्वरोजगार कार्यक्रम अन्तरगत तिनीहरुले रोजगार पाएका हुन । सूचिकृत फर्म भरेका १ हजार ६ सय ४३ जना मध्ये ७६ जना छनौटमा परेको कैलारी गाँउपालिकाका रोजगार सहायक ईन्द्रश्याम चौधरीले निशाना न्युजलाई जानकारी दिए ।

बजेटअनुसार छनौट गरिने तथा बढी बजेट छ भने बढी ब्यक्ती छनौट गरिने गरेको उनले बताए । गत बर्षको तुलनामा चालु आवमा कम बजेटका कारण थोरै व्यक्ती छनौटमा परेको उनको भनाइ छ । चालु आवमा जम्मा बजेट ५२ लाख ८९ हजार रहेको उनले बताए ।

‘रोजगार पाएका व्यक्तीले ज्यालदारीमा काम गर्नु पर्ने हुन्छ,’ चौधरीले भने ‘विकास निर्माण सम्बन्धिका काम जस्तै सडक मर्मत खानेपानी टंकी,पाइप लाइन विस्तार गर्दा नाली कोर्ने, पटानी, मन्दिर बगैचा निर्माणका काममा ज्यालादारी गर्नु पर्ने हुन्छ ।’

दैनिक ज्यालादारी रु. ६ सय ६८ रहेको उनले बताए । गत वर्ष ज्यालादारी ५ सय ७७ रहेको थियो भने यो बर्ष ९१ रुपैया बढेर ६ सय ६८ रुपैया रहेको उनले बताए ।

प्राविधिक सीप विकासका लागि २७ जना छनौट
कैलारी गाउँपालिकामा प्राविधिक सीप विकासका लागि २७ जना छनौट भएका छन । गाउँपालिकाको उद्यमशील विकास शाखा अन्तरगत चालु आवमा ३० जनाले आवेदन दिएका मध्ये २७ जना छनौटमा परेका हुन ।

१० जनाका लागि खाजा नास्ता सम्बन्धीको ७ दिने तालिम दिएको छ भने ३ जनाका लागि बेमौषमी तरकारी खेतीसम्बन्धि ३ दिने तालिम दिएको कैलारी गाउँपालिका उद्यमविकास सहजकर्ता निर्मला चौधरीले जानकारी दिइन ।

त्यस्तै ३ जनाका लागि मोटरसाइकिल रिपेयरिङ्ग ४५ दिने तालीम र बाँकी ११ जनालाई सिलाइकटाई आधारभूत तालिम दिएको उनले बताइन ।
चालु आवमा संघीय सरकारबाट १२ लाख बजेट बिनियोजन भएको उनले बताइन । यती पैसाले पुग्दैन तर पनि पुग्ने जति काम भईरहेको छ उनले भनिन् ।

स्तरउन्नतिका लागि २ लाख, ५ जना भएको उद्यमी समूहलाई प्रविधि हस्तान्तरणका लागि १ लाख ४० हजार तथा ८ लाख ६० हजार नयाँ उद्यमी सिर्जनाका लागि बजेट आएको उनको भनाइ छ ।

८ लाख ६० हजारको बजेटबाट प्रतिशतको हिसावमा २ जना सहजकर्ताका लागि ३ महिनाको तलब मात्र २ लाख ८३ हजार आठ सय रुपैयाँ हुन आउछ उनले भनिन् बाँकी बचेको बजेटबाट सीप विकासमा खर्चिने गरिन्छ ।