धनगढी- सुदूरपश्चिम प्रदेश सरकारले आगामी आव २०८१÷८२ का लागि नीति तथा कार्यक्रम प्रस्तुत गरेको छ । आज प्रदेश प्रमुख नजिर मियाँले प्रदेशसभामा नीति तथा कार्यक्रम प्रस्तुत गरेका हुन् ।

नीति तथा कार्यक्रम प्रतुत गर्दै उनले उद्यमशीलता विकास मार्फत रोजगार एवं स्वरोजगारी सिर्जना गरि औधोगिक जनशक्ति उत्पादन मार्फत बेरोजगारी र गरिबी न्युनिकरण गर्ने खालका कार्यलाइृ प्राथमिकता दिइने बताए । परियोजनामा आधारित बजेट प्रणालीलाई आत्मसाथ गर्दै उच्च सामाजिक र आर्थिक लाभ दिने एवं पूँजी निर्माणमा योगदान पुट्टयाउने प्रदेश गौरव तथा रणनीतिक महत्व र रुपान्तरणकारी योजनाको सम्भाव्यता अध्ययन गरी योजना बेंकमा सुचिकृत गर्ने कार्यलाई उच्च प्राथमितामा राखिने उनले बताए ।

उनले भने गरिबीको रेखामुनि रहेका स्वरोजगार बन्न चाहने युवा युवती तथा दुर्गम हिमाली क्षेत्रका बासिन्दालाई बिशेष प्राथमिकता दिइ स्वरोजगार कोष मार्फत सीपमूलक तालिम तथा सहुलित व्याजदरमा कर्जा प्रदान गरी स्वरोजगार र उद्यमशील बन्न प्रेरित गरिनेछ । ‘प्रदेश सरकार कृषकको सहयात्री’ नाराकासाथ कृषि उत्पादनको लागत न्युनिकरण,उत्पादन तथा उत्पादकत्व बृद्धि गर्न बीउ,बेर्ना,सिचाइ, मललगायतको उत्पादन सामग्री तथा कृषि कर्जामा प्रदान गर्दै आएको सहुलियतलाई निरन्तरता दिइने उनले बताए ।

उनले उत्पादनमा आधारित कृषि अनुदानको प्रभावकारी कार्यान्वयनका लागि स्थानीय तहमा वित्तीय हस्तान्तरण गरिने बताए । नीति तथा कार्यक्रम प्रस्तुत गर्दै प्रदेश प्रमुख मियाँले कृषिमा आत्मनिर्भर सुदूरपश्चिम प्रदेश सरकारको अभियान सञ्चालन गरि आगामी पाँच वर्षभित्र दाल तरकारी मसला बाली,फलफूल मासु र अण्डामा आत्मनिर्भर उन्मुख हुने नीतिलाई निरन्तरता दिइने बताए । त्यस्तै नीति तथा कार्यक्रममा कृषि तथा पशुपंछी व्यवसाय सञ्चालनका लागि आवश्यकता अनुसार पूर्वाधार र्निाण,सुदृढिकरणलाई निरन्तरता दिइने उल्लेख छ ।