धनगढी- नेपाली कांग्रेस सुदूरपश्चिम प्रदेश संसदीय दलका नेता एवं पूर्व मुख्यमन्त्री कमलबहादुर शाहले प्रदेश सरकारले बजारमा आएको हल्लाअनुसार बजेट आए पास हुन नदिने बताएका छन् ।
संसदीय दलले आज धनगढीमा आयोजान गरेको पत्रकार सम्मेलन बोल्दै उनले बजेट निर्माणमा सरकार सजग हुनुपर्ने बताए । उनले भने,‘बजेट इन्ट्री गर्ने र बनाउने काम सचिवालयले गरिरहेको छ भन्ने कुरा सुन्नमा आएको छ । बजेटमा बिचौलियाको बिगबिगी भनेर सञ्चार माध्यममा आइरहेको छ । यसमा सरकारलाई ध्यान दिन आग्रह गर्न चाहान्छु ।’ उनले भने ‘म कर्मचारीलाई पनि आग्रह गर्न चाहान्छु । तपाईहरु दवावमा होइन,विधि,पद्धति र कानुनमा रहेर काम गर्नुहोस्, तपाइहरुको साथमा हामी छौँ ।
त्यस्तै उनले प्रदेश सरकारले ल्याएको नीति तथा कार्यक्रम पनि शीर्षक मात्रै बदलेर आएको बताए । जनताका जनजीविकासँग जोडिएका विषय तथा रोजगारी सिर्जना गर्ने कुरा नीति तथा कार्यक्रममा समेटिन नसकेको उनले बताए । उनले भने ‘पार्टीका कार्यकर्ता भएकै कारण नीति तथा कार्यक्रम उनीहरुको नाम शीर्षकमा राखेर आएको छ । नीति तथा कार्यक्रममा भएका धेरै कुरा बजेटमा आउनु हुन्न । सुधार गर्नु पर्छ । जुन रुपले नीति तथा कार्यक्रम आएको छ, त्यहीरुपमा बजेट आए हामी विरोध गर्छौँ ।’
त्यस्तै उनले सरकारले मन्त्रालय भन्दा बढी मन्त्री नियुक्त गर्ने कुरा राम्रो नभएको बताए । उनले भने ‘सरकार जोगाउनका लागि मन्त्रालय फुटाउने कुरा राम्रो होइन् । यहाँको स्रोत साधन न्युन छ । आर्थिक व्ययभार थप्ने कुरा उचित छैन् ।’ त्यस्तै संघीय अनुदान घटेर आएको बेला नीति तथा योजना आयोग बजेटको सिलिङ बढाउनले कुरा उचित नभएको उनले बताए ।
