धनगढी- आन्तरिक राजस्व कार्यालय धनगढीले चालु आवका ११ महिनामा रु दुई अर्ब २१ करोड ११ लाख राजस्व सङ्कलन गरेको छ ।
कार्यालयले चालु आव २०८०÷८१ को साउनदेखि जेठ मसान्तसम्मको अवधिमा उक्त राजस्व सङ्कलन गरेको हो ।

आन्तरिक राजस्व कार्यालय धनगढीका सूचना अधिकारी छत्रबहादुर माझीका अनुसार आयकरबाट रु.एक अर्ब २२ करोड तीन लाख,मुल्य अभिबृद्धि करबाट रु ७९ करोड १८ लाख,अन्तशुल्कबाट रु १४ करोड, व्याजबाफत रु चार करोड ६६ लाख,बाहाल करबाट रु एक करोड १८ लाख र स्वास्थ्य सेवा करबाट दुई लाख ९८ हजार राजस्व सङ्कलन भएको छ ।

उनका अनुसार कार्यालयको चालु आवको जेठ मसान्तसम्म दुई अर्ब ५७ करोड २४ लाख राजस्व सङ्कलनको लक्ष्य रहेकोमा लक्ष्यको ८५ दशमलव ९५ प्रतिशतमात्रै राजस्व सङ्कलन भएको छ । कार्यालयको चालु आव २०८०÷८१ मा रु तीन अर्ब ८ करोड ४१ लाख राजस्व सङ्कलन गर्ने वार्षिक लक्ष्य रहेकोमा ११ महिनामा सङ्कलन भएको राजस्व वार्षिक लक्ष्यको ७१ दशमलव ६९ प्रतिशत रहेको सूचना अधिकारी माझीले जानकारी दिए ।

‘पूँजिगत खर्च कम छ,आर्थिक मन्दीले करदाताको कारोवारमा कमी आएको छ’, उनले भने ‘आर्थिक क्रियाकलाप बढ्न सकेको छैन् । जसले गर्दा राजस्व सङ्कलन लक्ष्यमा पुग्न सकिरहेको छैन् ।’ कार्यालयको गत आव २०७९÷८० मा रु तीन अर्ब ३६ करोड राजस्व सङ्कलनको वार्षिक लक्ष्य रहेकोमा रु दुई अर्ब ५७ करोड ९८ लाखमात्रै राजस्व सङ्कलन भएको सूचना अधिकारी माझीले जानकारी दिए । जुन वार्षिक लक्ष्यको ७६ दशमलव ७८ प्रतिशतमात्रै थियो ।