धनगढी– कञ्चनपुरको पुनर्वास नगरपालिकामा आर्थिक बर्ष २०८०।८१ मा प्रधानमन्त्री रोजगार कार्यक्रम अन्तरगत १ सय ७१ जनाले रोजगारी पाएका छन । पालिकामा ९ सय ३६ जना सुचीकृत मध्ये १ सय ७१ व्यक्तिहरुले रोजगारी पाएका हुन ।
दोदानदीको तटबन्धन,प्यारातालको स्तरोन्नति, पर्यटकीय क्षेत्रको वातावरणीय सरसफाई, सडक मर्मतसम्भार लगायतका क्षेत्रमा उनीहरुले काम गरेको पुनर्वास नगरपालिकाका प्राविधिक सहायक घनश्याम थापाले जानकारी दिए ।
विश्व बैंकको सहयोगमा एक सय दिन काम गर्न ३७ जनाका लागि २६ लाख ७२ हजार र नेपाल सरकारबाट १ सय ३४ जनाका लागि २३ लाख २२ हजार रकम पालिकामा आएको उनले बताए । ‘आएको सबै पैँसा खर्च हुदैन’ उनले भने ‘बचत हुने रकम अर्को बर्षका लागि उपयोग हुन्छ ।’
‘वडा नं. ७ को जग्गा कटान रोक्न ३ सय मिटरको जैबिक तटबन्धन निर्माणमा केही व्यक्तिले काम गरेका थिए’, उनले भने ‘वडा नं ९ मा अढाई सय मिटर तटबन्धनमा ५ जनाले काम गरेका थिए ।’ सो कार्यबाट प्रधानमन्त्री रोजगार कार्यक्रममा सघाउ पुगेको बताउँदै उनले कटान रोक्न स्थानीय समेत जागरुक भएर लागेको उनले बताए ।
