धनगढी । डिभिजन वन कार्यालय कैलालीले विश्व वातावरण दिवस-२०८२ विविध कार्यक्रम गरी मनाएको छ । सो अवसरमा कार्यालय हाता भित्र बृक्षारोपण गरेको छ ।
कार्यालयको हाता भित्र विभिन्न प्रजातिका बोटबिरुवा रोपेको जिल्ला वन कार्यालय कैलालीका सूचना अधिकारी एवं वरिष्ठ वन अधिकृत समीर थापाले निशाना न्युजलाई जानकारी दिए ।
डिभिजन वन कार्यालयका प्रमुख कृष्णदत्त भट्टले वातावरण क्षेत्रमा काम गर्ने कर्मचारीको अहम भूमिका रहेको बताए । उनले रुख रोपेर हरियाली वातावरण निर्माण गर्नु सबैको कर्तव्य भएको बताउँदै प्लास्टिक जन्य वस्तुको कम प्रयोग गरि वातावरण प्रदुषण हुनबाट बचाउन जरुरी रहेको बताए ।
अहिलेको अवस्थामा प्लास्टिकलाई न्युनिकरण गर्न जरुरी नै रहेको उनको भनाइ छ ।
डिभिजन वन कार्यालय भेरी बाबियाचौर सुर्खेतले पनि विश्व वातावरण दिवस मनायो
त्यस्तै डिभिजन वन कार्यालय भेरी बाबियाचौर सुर्खेतले पनि विभिन्न कार्यक्रम गरि विश्व वातावरण दिवस मनाएको छ । पंचपुरी नगरपालिका(५ को विद्याज्योति माध्यमिक विद्यालय र चौकुने गाउँपालिका अन्तरगत गुठुमा एक कार्यक्रमको आयोजना गरि सो दिवस मनाएको हो ।
कार्यक्रको उदघाटन गर्दै पंचपुरी नगरपालिकाका नगर प्रमुख लालवीर भण्डारीले प्लास्टिकजन्य वस्तुको कम प्रयोग गर्न र बृक्षारोपण गरि स्वच्छ वातावरण निर्माणमा सबैले जुट्न जरुरी रहेको बताए ।
कार्यक्रमको अध्यक्षता डिभिजन वन कार्यालयका भेरी बाबियाचौर सुर्खेतका वरिष्ठ वन अधिकृत बलमलाल चौधरी रहेका थिए ।
चौकुने गाउँपालिका गुठुमा आयोजित कार्यक्रमको अध्यक्षता डिभिजन वन कार्यालयका वन अधिकृत दिपेन्द्र महत्तले गरेका थिए । उनले कार्यक्रमको समापन गर्दै स्वच्छ वातावरण निर्माणका लागि आ-आफ्नो क्षेत्रबाट सबैले हातेमालो गर्दै अघि बढ्न जरुरी रहेको बताए ।
कार्यक्रम अघि पंचपुरी सव डिभिजन वन कार्यालयबाट बाबिया बजार हुँदै पंचपुरी नगरपालिका-५ को विद्याज्योति माध्यमिक विद्यालयसम्म र्याली निकालेको वरिष्ठ वन अधिकृत प्रिन्स जैसवालले जानकारी दिए । उनले कार्यक्रममा राजनितिक दल ,शिक्षक,विद्यार्थीको उल्लेख्य उपस्थिति रहेको बताए ।
