धनगढी । सुदूरपश्चिम प्रदेशको आर्थिक मामिला मन्त्रालयका सचिव राजेन्द्रकुमार हमाल सरुवा भएको एक साताभन्दा बढी समयसम्म रमाना बुझेका छैनन् ।

संघीय मन्त्रिपरिषद् बैठकले गत ३१ भदौमा हमालको सरुवा राष्ट्रिय महिला आयोग काठमाडौँमा गरेको थियो । तर उनी अहिले पनि मन्त्रालयमै कार्यरत छन् ।

मन्त्रिपरिषद्को निर्णयअनुसार भूमि व्यवस्था, सहकारी, संघीय मामिला तथा सामान्य प्रशासन मन्त्रालयले सरुवा भएको जानकारीसहितको पत्र यही २ असोजमा हमाललाई पठाएको छ । उक्त पत्रको बोधार्थमा मुख्यमन्त्री तथा मन्त्रिपरिषद्को कार्यालय, आर्थिक मामिला मन्त्रालयलगायत निकाय उल्लेख छ ।

सरकारले सरुवा गरिसके पनि सचिव हमाल भने रमाना बुझेर सरुवा भएको कार्यालयमा गएका छैनन् । मन्त्रालयका एक कर्मचारीका अनुसार उनी बुधबार पनि मन्त्रालयमै थिए । बजेट शून्यतामा रहेको सुदूरपश्चिममा प्रदेश सरकारले अहिले चालु वर्षको बजेट निर्माण गरिरहेको छ । सरुवा भएका सचिव हमाल मन्त्रालयमा बजेट निर्माणमा सक्रिय छन् ।

मुख्यमन्त्री कार्यालय स्रोतका अनुसार सचिव हमालले रमाना बुझ्न मानेका छैनन् । ‘सरुवा भएको सात/आठ दिनसम्म, त्यो पनि बजेट निर्माणका बेला सचिवज्यू रमाना बुझेर सरुवा भएको ठाउँमा नजानुले बजेटमा केही स्वार्थ छ भन्ने प्रश्न उठेको छ’ कार्यालयका एक अधिकारीले भने, ‘उहाँ आफ्नो सरुवा रोकेर आर्थिक मामिला मन्त्रालयमै बस्न खोजिरहनु भएको छ । त्यसैको चलखेलका लागि उहाँले रमाना लिनु भएको छैन ।’

तत्कालीन सरकारले प्रस्तुत गरेको बजेट प्रदेश सभाबाट पारित हुन नसकेपछि १ साउनबाट सुदूरपश्चिम बजेट शून्यतामा छ । उक्त बजेट सत्ता पक्षमै विवादित बनेको थियो । योजना छनोट सम्बन्धी सरकार आफैले बनाएको मापदण्डको व्यापक उल्लंघन गरेको उक्त बजेट निर्माणमा आर्थिक मन्त्रालयको सचिवको हैसियतले हमाल पनि संलग्न थिए । त्यसबेला बजेट निर्माणमा उनको भूमिका विवादास्पद बनेको थियो ।

विषयगत मन्त्रालयको बजेट आर्थिक मामिला मन्त्रालयले छेडखानी गरेको र सरकारको नीति तथा कार्यक्रमभन्दा फरक बजेट आएको आरोप सत्तापक्षका सांसदले नै लगाएका थिए । पहुँचवाला र स्वार्थ समूह अनुकुल बजेट बनाउन तत्कालीन मन्त्री र सचिवको भूमिका रहेको आरोप लागेको थियो ।

उक्त बजेटका केही विवादास्पद विषय मिलाउन पनि सचिव हमाल मन्त्रालयमै बस्न खोजेको बताइएको छ । बजेट निर्माणमा चलखेल गर्नकै लागि उनी सरुवा भएको ठाउँ जान आनकानी गरिरहेको आरोप लागेको छ । ‘सकेसम्म सरुवा रोक्ने र नभए नियमानुसार रमाना पत्र बुझिसक्नु पर्ने अन्तिम मितिसम्म मन्त्रालयमा रहेर बजेट निर्माणमा संलग्न रहने मनसाय देखिन्छ’ स्रोतले भन्यो, ‘अघिल्लो बजेट निर्माणमा हावी भएको स्वार्थ समूह त्यो बजेटका विवादित विषय मिलाउन पनि सचिवलाई यहीँ रोक्ने प्रयत्नमा छ ।’ सरकारले यही १५ असोजभित्र बजेट ल्याउने गरी तयारी गरिरहेको छ ।

स्रोतका अनुसार सरकारको राजनीतिक र प्रशासनिक तहमा पनि हमाललाई यहीँ रोक्ने दवाव परेको छ । मुख्यमन्त्री तथा मन्त्रिपरिषद्को कार्यालयका प्रवक्ता जगदीस जोशीले भने सचिव हमालको सरुवा भएको आधिकारीक जानकारी प्राप्त भइनसकेको बताएका छन् । सरुवा भएको ठाउँमा नगएकोबारे प्रतिक्रिया लिन सम्पर्क गर्दा सचिव हमालले फोन उठाएनन् ।