धनगढी । सम्भावित भारी वर्षा, बाढी, पहिरो तथा डुबानको जोखिमलाई मध्यनजर गर्दै धनगढी उपमहानगरपालिकाले नगर क्षेत्रका सामुदायिक तथा संस्थागत विद्यालयलाई आवश्यकताअनुसार विद्यालय बिदा गर्न आग्रह गरेको छ।
धनगढी उपमहानगरपालिकाको शिक्षा तथा खेलकुद शाखाले बिहीबार सूचना जारी गर्दै यही असोज ९, १० र ११ गते नेपालका विभिन्न स्थानमा भारीदेखि अति भारी वर्षा, उच्च पहाडी तथा हिमाली क्षेत्रमा हिमपात, हावाहुरी तथा चट्याङको सम्भावना रहेको भन्दै विद्यालय बिदा गर्न सकिने जनाएको हो ।
शिक्षा तथा खेलकुद मन्त्रालयको असोज ७ गतेको समन्वय तथा सहजीकरणसम्बन्धी पत्र तथा सोही मितिको सार्वजनिक सूचनाका आधारमा जल तथा मौसम विज्ञान विभाग,राष्ट्रिय विपद् जोखिम न्यूनीकरण तथा व्यवस्थापन प्राधिकरण र सम्बन्धित क्षेत्रका विज्ञहरूको पूर्वानुमानलाई ध्यानमा राख्दै यस्तो आग्रह गरिएको उपमहानगरपालिकाले जनाएको छ।
सम्भावित वर्षाका कारण बाढी, पहिरो, डुबान, नदी कटान, सडक अवरोध तथा विद्युत र सञ्चार सेवामा अवरोध हुनसक्ने जोखिम रहेको भन्दै विद्यालयहरूले स्थानीय अवस्था र जोखिमको विश्लेषण गरी आवश्यकताअनुसार बिदा गर्न सक्ने जनाइएको छ । यस्तो बिदा विद्यालयले पाउने स्थानीय बिदाबाट कट्टी हुने सूचनामा उल्लेख छ।
उपमहानगरपालिकाले अभिभावकहरूलाई समेत आफ्ना बालबालिकालाई नदी, खोला, पोखरी, डुबान क्षेत्र, नदी कटान क्षेत्र तथा पहिरोको जोखिम भएका स्थानमा जान नदिन आग्रह गरेको छ।
