धनगढी,
नेपाली काँग्रेस कैलालीले आगामी वैशाख ३० गते हुने स्थानीय तहको निर्वाचनलाई लक्षित गर्दै पार्टीको ‘घर–घर जाऔं, काँग्रेस जिताऔं’ अभियानका लागि जिल्लाभर जिल्ला प्रतिनिधि खटाएको छ ।

जिल्ला कार्यसमितिको यही चैत २ गते बसेको बैठकको निर्णय अनुसार निर्वाचन लक्षित अभियान सम्पन्न गर्नका लागि जिल्लाका १२६ वटै वडामा महासमिति सदस्य, महाधिवेशन प्रतिनिधि र जिल्ला सदस्यलाई जिल्ला प्रतिनिधिका रुपमा खटाइएको काँग्रेस कैलालीका सचिव नृपबहादुर सुनारले जानकारी दिए । उनले जिल्ला प्रतिनिधिहरुलाई विभिन्न १० जिम्मेवारी दिएर जिल्लाभर खटाइएको बताए ।

उनका अनुसार प्रतिनिधिलले चैत्र ९ गते (बुधबार) वडा कार्यसमिति र वडामा भएका विभिन्न तहका पार्टीका साथीहरुसँग बैठक आयोजना गर्नुपर्ने, वडामा टोल कार्यसमिति गठन भए नभएको जानकारी लिने र नभएको भए तत्काल गठन गर्र्न वडा कार्य समितिलाई परिचालन गर्नुपर्ने, चैत गते वडामा जागरण अभियानको प्रचार प्रसारका लागि सभा आयोजना गर्नुपर्ने, वडाको मतदाता नामवलीको विष्लेषण गर्न वडामा भएका पार्टी नजिकका शिक्षक, प्राध्यापक, वकिल, सामाजिक अभियन्ता र बुद्धिजिविसँग छलफल गर्ने र घोषणापत्र बनाउन जिम्मेवारी दिने जिम्मेवारी दिइएको छ ।

यसैगरि अभियान अन्तर्गत घरदैलो कार्यक्रमका लागि टोल समितिसँग बैठक गरि कार्यतालिका निर्माण गरेर चैत्र १३ गतेदेखि २० गतेसम्मको योजना निर्माण गर्ने, भातृ एवं शुभेच्छुक संघसंस्थाहरुलाई शसक्त र प्रभावकारी बनाउन आवश्यक पहल गर्नुका साथै भ्रातृ संस्थाहरुको विधान बमोजिम वडाको संरचना निर्माण गर्न अभिप्रेरित गर्नुपर्ने, उक्त वडामा नेपाली काँग्रेस पार्टी तथा प्रतिस्पर्धी राजनीतिक दल र दलका उम्मेदवारहरुको अवस्थाको तुलनात्मक अध्ययन र मुल्यांकन गरी निश्कर्ष निकाल्नुपर्ने जिम्मेवारी छन् ।

चैत २२ गते हुने जिल्ला कार्य समितिको बैठकमा निर्देशित सम्पूर्ण विवरणहरु संकलन गरी आफ्नो सुझावसहितको लिखित प्रतिवेदन पेश गर्ने र अभियान अवधीसम्म तोकिएकै वडामा घरदैलोमा बसी कार्य सम्पन्न गर्ने जिम्मेवारी दिइएको सचिव सुनारले जानकारी दिए । उनका अनुसार अभियानका लागि खटाइएका प्रतिनिधिहरुले गरेको कार्यको अनुगमन गर्न पनि अनुगमन प्रतिनिधि खटाइएको सचिव सुनारले बताए ।