महेन्द्रनगर – कञ्चनपुरको कृष्णपुर नगरपालिकामा चार हजार बिरुवा रोपिएका छन् । कृष्णपुर नगरपालिकाको आयोजनामा वडा नम्बर ५ को हरियाली सामुदायिक वन क्षेत्रमा शनिवार एक कार्यक्रमका बिच नगरप्रमुख हेमराज ओझाले बेतको बिरुवा रोपेर वृक्षारोपण कार्यक्रमको उद्घाटन गरेका हुन् । सामुदायिक वनको उत्तर पूर्वी भागमा २ हजार बेत र २ हजारभन्दा अधिक बाँसका बिरुवा रोपिएका हुन् ।
नगरप्रमुख ओझाले कृष्णपुरका अधिकांश सामुदायिक वनसँग सहकार्य गर्दै बेत र बाँस ठुलो मात्रामा उत्पादन गरेर नगरमै उद्योग सञ्चालनमा ल्याउने योजना रहेको बताएका छन् । उनले एकातिर वनजंगल हराभरा भए वातावरण स्वच्छ रहने र अर्कोतिर स्थानीयलाई आफ्नो सीप तथा कला मार्फत रोजगारी सृजना हुने भएकोले आफूले बेत र बाँस रोपन कार्यक्रमलाई प्राथमिकतामा राखेको बताए ।
नगरप्रमुख ओझाले वडा नम्बर ४ को चुरे क्षेत्रतिर मह उत्पादनको पक्कड क्षेत्र भएकाले चिउरी खेती,बजारमा कागतीको असाध्यै माग हुने भएकोले विभिन्न सामुदायिक वनहरूसँग समन्वय गर्दै कागती खेती गर्ने योजना रहेको बताए । अघिल्लो वर्ष पनि हरियाली सामुदायिक वनमै झण्डै २ हजार बाँसका बिरुवा रोपिएका थिए ।
वृक्षारोपण कार्यक्रममा नगरप्रमुख ओझासहित कृष्णपुर नगरपालिका वडा नम्बर ५ का वडाध्यक्ष टेक पाण्डे,हरियाली सामुदायिक वनका अध्यक्ष नित्यानन्द जेठारा, पूर्व अध्यक्ष दिल देउवा, सशस्त्र प्रहरी बल शैलेश्वरी गण झलारीबाट मोहनदेव पन्तको नेतृत्वमा ३० जनाको टिम र दर्जनौँ संख्यामा स्थानीयको उपस्थिति रहेको थियो ।
