कञ्चनपुर- कञ्चनपुरमा एक घुमुवा प्रहरीमाथी कुटपिट भएको छ। सुदूरपश्चिम प्रदेश प्रहरी अन्तरगत हालै गठन गरिएको सुदूूरपश्चिम प्रदेश अनुसन्धान समूह (आरआइटी) टोलीका प्रहरी जवान रञ्जित साउँद कुटपिटमा परेका हुन्।
स्रोतका अनुसार सुदूरपश्चिमका प्रमुख प्रहरी नायब महानिरीक्षक (डीआईजी) भरतबहादुर बोहराले गठन गरेको आरआइटी समूहका एक सिपाही कुटिएका हुन्।
सोमवार जिल्लाको पुनर्वास नगरपालिका वडा नम्बर ११ टाउके बजारमा आरआईटीमा कार्यरत प्रहरी जवान साउँदलाई स्थानीय युवाहरुले कुटेका हुन्। उनलाई युवाको समूह सडकमा उतारेर मोटरसाइकल चेकजाँच गर्दै दुःख दिएपछि स्थानीयले कुटपिट गरेका हुन्।
साउँदले मदिरा सेवन गरेर आफू डीआईजी भरत बोहराको मान्छे भन्दै सादा पोशाकमा मोटरसाइकल चेकजाँच गर्दै लाइसेन्स र ब्लुबुक मागेर हैरान गर्न थालेपछि हातपात भएको बताइएको छ।
साउँद डीआईजी बोहराका नातेदार समेत पर्ने बुझिएको छ। प्रहरीको सुदूरपश्चिम प्रमुख भएर आएपछि नातावाद र क्षेत्रियता लाधेको आरोप खेपिरहेका डीआईजी बोहराले साउँदलाई बैतडीबाट ल्याएर आरआइटीमा राखेका थिए।
बोहराले आवश्यकता र औचित्य नरहेको भन्दै आरआईटी भंग गरेका थिए तर उनले लगत्तै आफ्ना नातेदार पर्ने प्रहरी वरिष्ठ नायब निरीक्षक डेनी स्वाँरको नेतृत्वमा आरआईटी गठन गरेका थिए। सुदूरपश्चिम प्रदेश अनुसन्धान समूह (आरआईटी) मा आवद्ध प्रहरी जवान रंञ्जित साउँदले कुटिएको घटना लुकाइएको छ।
तर, जिल्ला प्रहरी कार्यालय कञ्चनपुरका प्रमुख प्रहरी उपरीक्षक (एसपी) कमल थापाले घटनाबारे रिर्पोटिङ नभएको दाबी गरे। कञ्चनपुर प्रहरीलेसमेत घटनाको विषयमा कुनै जानकारी नभएको बताएको छ। घटनापछि साउँदको फेरि बैतडी नै सरुवा गरिएको स्रोतले बताएको छ ।
