धनगढी- सुदूरपश्चिम प्रदेशका भौतिक पूर्वाधार विकासमन्त्री प्रकाशबहादुर देउवाले अलपत्र अवस्थामा रहेको धनगढी गाउँ–जुगेडा जोड्ने सडकको अनुगमन गरेका छन् । नाजुक अवस्थामा रहेको उक्त सडक निर्माणका लागि उनले अनुगमन गरेका हुन् ।
सो सडकको अवस्था नाजुक भएको खबर पाएपछि मन्त्री देउवा सडकको स्थलगत अनुगमनमा गएका थिए । धनगढी गाउँदेखि जुगेडासम्म ६।३ किलोमिटर रहेको सो सडक अब प्रदेश सरकारले निर्माण गर्ने जनाइएको छ ।
केही दिनभित्रै सडक निर्माणको ठेक्का हुने धनगढी उपमहानगरपालिका–१ का वडाध्यक्ष सन्तोष मुडभरीले जानकारी दिए । उनका अनुसार सडकको विस्तृत परियोजना प्रतिवेदन (डिपिआर) बनिसकेको छ । “अब केही दिनभित्रै ठेक्का हुन्छ,” उनले भने । यो सडक निर्माणमा क्षेत्रीय सहरी परियोजनाको पनि साझेदारी रहने जनाइएको छ ।
