काठमाडौं- आज इलाम, झापा, उदयपुर, सिन्धुलीसहितका केही जिल्लाका साना नदीहरुमा बाढीको सम्भावना छ । जल तथा मौसम विज्ञान विभागको बाढी पूर्वानुमान महाशाखाका अनुसार आज यी जिल्लामा बाढीको सम्भावना रहेको छ ।
यस्तै, मकवानपुर, कास्की, लमजुङ, पर्वत, दैलेख, कञ्चनपुर, डडेलधुरा, बझाङ, दार्चुला र आसपास भएर बहने नदीहरुमा पनि बाढीको सम्भावना रहेको महाशाखाले जनाएको छ ।
आज र भोलि देशका प्रमुख सहायक नदीहरूमा जलसतह सतर्कता तहभन्दा तलै रहने महाशाखाले जनाएको छ । पर्सि (सोमबार)देखि कर्णाली, महाकाली, बबई, राप्ती, कन्काई र नारायणी नदीका केही सहायक नदीहरुको जलसतह उल्लेख्य बढ्न सक्ने पूर्वानुमान छ ।
पर्सि लुम्बिनी र सुदूरपश्चिम प्रदेशको तराई भू–भाग भएर बहने केही स–साना नदीहरुमा आकस्मिक बाढीको जोखिम रहने पूर्वानुमान रहेकाले तटीय क्षेत्रमा उच्च सतर्कता अपनाउन महाशाखाले अनुरोध गरेका छ ।
