काठमाडौँ- नेपालमा डेंगु संक्रमणको त्रास आगामी कात्तिक महिनासम्म रहने जनस्वास्थ्य विज्ञहरू बताउँछन् । यद्यपि अब संक्रमित संख्या क्रमशः ओरालो लाग्दै जाने ईडीसीडी अन्तर्गत किट्जन्य शाखाका प्रमुख डा। गोकर्ण दाहालको जिकिर छ ।
७५ जिल्लामा संक्रमण पुष्टि हुँदा सबैभन्दा धेरै सुनसरी जिल्ला प्रभावित बनेको छ । हुम्ला र मुगु जिल्लामा डेंगु संक्रमण नदेखिएको ईपीडीमियोलोजी तथा रोग नियन्त्रण महाशाखा (ईडीसीडी) ले जनाएको छ । सुनसरी जिल्लामा मात्रै गएको पुस महिना यता १४ हजार २२८ जनामा संक्रमण भएको छ । यस्तै, विगत १० दिनको अवधिमा २ हजार ५७० मा डेंगु संक्रमण पुष्टि भएको छ ।
ईडीसीडीबाट प्रकाशित तथ्याङ्क अनुसार सुनसरी जिल्लामा मात्रै भदौ १५ मा ३७४ जनामा संक्रमण पुष्टि भएको छ । भदौ १७ मा ३९८ संक्रमित भएका छन् भने १८ गते ३७५ मा संक्रमण भएको थियो । यस्तै, २० गते संक्रमितको संख्या बढेर ७२० पुगेको थियो २१ गते ३५१ र २२ गते ३५२ जनामा संक्रमण पुष्टि भएको छ ।
