बैतडी– सवारी दुर्घटनामा परेर बैतडीमा एक वर्षको अवधिमा २४ जनाको मृत्यु भएको छ। गत आर्थिक वर्ष २०७८/७९ मा १३ वटा सवारी दुर्घटनामा परेर २४ जनाको ज्यान गएको बैतडीका प्रहरी प्रवक्ता, प्रहरी निरीक्षक लोकराज जोशीले जानकारी दिए। जिल्ला प्रहरी कार्यालय बैतडीका अनुसार गत आर्थिक वर्षमा ५ वटा जिप, ३ वटा मोटरसाइकल, २ ट्याक्टर, एक बस, एक टिप्पर र एक मिनी ट्रक दुर्घटनामा परेका छन्।
ती सवारी दुर्घटनामा १५ पुरुष, ५ महिला र ४ बालकको ज्यान गएको हो। यस्तै दुर्घटनामा परेर २३ जना घाइते भएका हुन्। ट्राफिक नियम पालना नहुनु, कच्ची सडकलगायतका कारणले सवारी दुर्घटना हुने गरेको जनाइएको छ। यसैबीच गत एक वर्षमा ट्राफिक प्रहरीले बैतडीमा ३ हजार ८ सयभन्दा बढी सवारीसाधनलाई कारबाही गरेको छ। गत आर्थिक वर्ष २०७८/७९ मा ट्राफिक नियम उल्लंघन गर्ने ३ हजार ८२६ सवारीसाधनलाई कारबाही गरिएको हो।
ट्राफिक नियम उल्लंघन गर्ने ४१५ ट्रक-ट्याङ्कर, ६४ वर्ष, २ हजार ९३ जीप कार र भ्यान कारबाहीमा परेका जिल्ला ट्राफिक प्रहरी कार्यालय बैतडीका प्रमुख रामसिंह भण्डारीले बताए। यस्तै ३०२ ट्याक्टर, ७७२ मोटर साइकल र १४० वटा अन्य सवारीसाधन कारबाहीमा परेका छन्।
सवारीसाधन चलाउँदा सवारी चालक अनुमति पत्र (लाइसेन्स) नभएका, सिट बेल्ट तथा हेलमेट नलगाउने, मादकपदार्थ सेवन गरेका, क्षमताभन्दा धेरै यात्रु बोक्ने, तीव्र गति लगायतका नेपाल सरकारले तोकेको सवारी नियम उल्लंघन गर्ने सवारीसाधन कारबाहीमा परेका बताइएको छ। सवारीसाधन कारबाहीबाट २१ लाख १८ हजार राजस्व संकलन भएको छ।
अघिल्लो आर्थिक वर्ष २०७७/७८ मा पनि ४ हजार ३४३ सवारीसाधन कारबाही परेका थिए। कारबाहीमा परेका सवारीसाधनबाट ट्राफिक प्रहरीले २५ लाख २५ हजार राजस्व संकलन गरेको थियो। जिल्लाको साहिलेक सतबाँझ, पाटन र खोड्पेमा गरेर चार ठाउँमा ट्राफिक प्रहरी पोष्ट रहेका छन्।
