धनगढी- खाद्य व्यवस्था तथा व्यापार कम्पनीले कैलालीमा लक्ष्यको ३१ दशमलव ३१ प्रतिशत मात्रै धान खरिद गर्न सकेको छ । खाद्य कम्पनीले यस वर्ष लक्ष्यअनुसारको धान खरिद गर्न नसकेको हो ।
जिल्लाबाट ६० हजार क्वीन्टल धान खरिद गर्ने लक्ष्य रहेकोमा हालसम्म १८ हजार ७ सय ८८ क्वीन्टल मात्रै धान खरिद भएको खाद्य व्यवस्था तथा व्यापार कम्पनी लिमिटेड सुदूरपश्चिम प्रादेशिक कार्यालय धनगढीका सूचना अधिकारी सन्तोष विकले जानकारी दिए ।
उनका अनुसार जिल्लाको मोहनपुर,टीकापुर,सत्ती,भजनी,बर्दगोरिया गरि पाँच ठाउँमा धान खरिदका लागि कम्पनीले डिपो राखेको थियो । ‘कैलालीमा पाँच ठाउँमा डिपो राखेका थियौँ ।’ उनले भने,‘एउटा डिपोमा त कोही पनि किसान धान बिक्रीका लागि आउनु भएन् । अन्य ४ वटा डिपोमा पनि धेरै कम धान खरिद भएको छ ।’
मोहनपुर डिपोमा १ हजार ८ सय ३१ क्वीन्टल,टीकापुरमा ९ हजार ४ सय ३१ क्विन्टल,सत्तीमा ४ हजार चार सय ४२ क्वीन्टल र भजनी डिपोमा ३ हजार ४९ क्वीन्टल धान खरिद भएको सूचना अधिकारी विकले बताए । बर्दयोरियामा राखिएको डिपोमा भने कोही पनि किसान धान बेच्न नआएको उनले बताए । सरकारले मोटो धान खरिदका लागि यस वर्ष ३ हजार १ सय ९८ रुपैया तोकेको र खाद्यले गत कार्तिक १९ गतेबाट नै समर्थन मुल्यमा जिल्लामा मोटो धान खरिद सुरु गरेको उनले बताए ।
सुरुमा धान बेच्न किसान डिपोमा आए पनि मंसिर मसान्तसम्मपछि भने आउनै छाडेको खाद्य व्यवस्था तथा व्यापार कम्पनी लिमिटेड प्रादेशिक कार्यालयका निमित्त कार्यालय प्रमुख कल्पना विष्ट ऐरले बताइन् । ‘हामीले यस वर्ष चाडै डिपो राखेका थियौँ । मुल्य पनि बढी थियो । थेग्न नसक्ने अवस्था हुन्छ कि भन्ने आशा थियो तर त्यसको विपरीत भयो ।’ उनले भनिन्,‘सुरु सुरुमा त केही किसान धान बेच्न आउनुभयो । मंसिरपछि किसान धान बेच्न आउनै छाड्नुभयो । त्यसैले धान खरिद लक्ष्यमा पुग्न सकेन ।’
‘खाद्य कम्पनीले धान खरिद सुरु गरेपछि व्यापारीले बढी मुल्यमा खरिद गरेकाले पनि खाद्यको डिपोमा किसान नआउनु भएको हुनसक्छ ।’ उनले भनिन्,‘बढी मुल्य पाउनु किसानका लागि राम्रो हो । व्यापारीबाट बढी मुल्य पाएकाले पनि खाद्यको डिपोमा किसान नआएका हुन सक्छन ।’ गत वर्ष पनि खाद्यले लक्ष्यअनुसारको धान खरिद गर्न नसकेको उनले बताइन् । गत वर्ष ४० हजार क्वीन्टल धान खरिदको लक्ष्य रहेकोमा ३० हजार १ सय ३१ क्वीन्टल मात्रै धान खरिद भएको उनले बताइन् । गत वर्ष सरकारले मोटो धानको २ हजार ९ सय ६७ रुपैया मुल्य तोकेको थियो ।
