धनगढी- कैलाली भन्सार कार्यालयले चालु आवका सात महिनामा लक्ष्यको ३७ दशमलव ३२ प्रतिशतमात्रै राजस्व असुली गर्न सकेको छ ।
कार्यालयले चालु आवको श्रावणदेखि माघ मसान्तसम्म वार्षिक लक्ष्यको ६२ दशमलव ६८ प्रतिशत कम राजस्व असुली गरेको हो ।

भन्सार कार्यालयको चालु आव २०८०÷८१ मा रु. ११ अर्ब ५८ करोड २४ लाख राजस्व असुलीको वार्षिक लक्ष्य रहेकोमा माघ मसान्तसम्म रु. ४ अर्ब ३२ करोड २९ लाख मात्रै राजस्व असुली भएको कैलाली भन्सार कार्यालयका सूचना अधिकारी पवित्रकुमार खड्काले जानकारी दिए ।
चालु आवका ७ महिनामा कुनै पनि महिना राजस्व असुली लक्ष्यमा पुग्न सकेको छैन् । सूचना अधिकारी खड्काका अनुसार चालु आवको साउन महिनामा रु.७२ करोड ३५ लाख लक्ष्य रहेकोमा रु. ४६ करोड ८२ लाख,भदौमा रु.८८ करोड ४० लाख लक्ष्य रहेकोमा रु.५१ करोड ९३ लाख,असोजमा रु.९७ करोड ८१ लाख लक्ष्य रहेकोमा रु.६३ करोड १४ लाख र कार्तिकमा रु.९७ करोड ५२ लाख राजस्व संकलनको लक्ष्य रहेकोमा रु.६१ करोड ६४ लाख असुली भएको छ ।

त्यस्तै मंसिरमा रु. १ अर्ब २ करोड २५ लाख लक्ष्य रहेकोमा रु.७३ करोड ३४ लाख,पुसमा रु.१ अर्ब ४ करोड १३ लाख लक्ष्य रहेकोमा रु.६८ करोड ९० लाख र माघमा रु.९२ करोड ६९ लाख राजस्व असुलीको लक्ष्य रहेकोमा रु.६६ करोड ६७ लाख असुली भएको उनले बताए ।
आयात घटेपछि राजस्व असुली घटेको कैलाली भन्सार कार्यालयका प्रमुख राजेन्द्रकुमार हमालले बताए । उनले भने ‘आयात घटेको छ । बढी राजस्व असुली हुने पेट्रोलियम पदार्थको खपत घटेपछि आयात घट्यो । यसले पनि राजस्व असुली प्रभावित भएको छ ।’

‘क्वारेन्टाइन नहुँदा तरकारी,फलफूल,खाद्यान्नलगायतको आयात लामो समय प्रभावित बन्यो । क्वारेन्टाइन सञ्चालनमा आएको अहिले दुई महिना मात्रै भएको छ ।’ उनले भने ‘विकास निर्माणका काम पनि धेरै भइरहेका छैनन् । काम भए आयात बढ्ने हो । यहाँबाट निर्यात थोरै मात्र हुन्छ त्यसले राजस्वमा प्रभाव पार्दैन् ।’ कार्यालयको गत आव २०७९÷८० मा पनि राजस्व असुली लक्ष्यमा पुग्न सकेको थिएन् । गत आवमा वार्षिक राजस्व असुलीको लक्ष्य रु.१२ अर्ब ३० करोड ६६ लाख रहेकोमा रु.८ अर्ब २९ करोड ६३ लाख राजस्व असुली भएको उनले बताए । जुन लक्ष्यको ६७ दशमलव ४१ प्रतिशतमात्रै थियो ।