बैतडी- भारतसँग सिमाना जोडिएको बैतडीको झुलाघाट नाकामा यस वर्ष राजश्व असुलीमा वृद्धि भएको छ । चालु आर्थिक वर्ष २०८०/०८१ मा ५० लाख राजश्व असुली गर्ने भनिएकोमा ४ महिना अघि नै ५६ लाख बढी राजश्व असुली गरिएको हो । चालु आर्थिक वर्षको साउनदेखि असार मसान्तसम्म्मा ५० लाख ८९ हजार राजश्व खसुली गर्ने लक्ष्य राखिएकामा चैत्रसम्ममा ५६ लाख ७६ हजार १६४ रुपैयाँ राजश्व संकलन भइसकेको झुलाघाट भन्सार कार्यालयका प्रमुख अनिल कुमार झाले जानकारी दिए ।
विगतका वर्षहरूमा राजश्व असुलीमा व्यापक गिरावट भएको भएपनि यस वर्ष भने राजश्व असुलीमा व्यापक वृद्धि भएको हो । गत आर्थिक वर्ष २०७९/८० मा ३८ लाख राजश्व खसुली गर्ने लक्ष्य लिइएकोमा ३५ लाख ३८ हजार रुपैयाँमा मात्रै राजश्व असुली गरिएको थियो । यस वर्ष भने लक्ष्यभन्दा ४ महिनाअघि नै लक्ष्यभन्दा १११ प्रतिशत राजश्व हाँसिल गरिएको भन्सार कार्यालय झुलाघाटले जनाएको छ । कोरोनाकालमा सुस्ताएको झुलाघाट नाका पछिल्ला वर्षहरूमा तङ्ग्रीएको भन्सार कार्यालयका प्रमुख झाले बताए ।
‘नेपालपट्टी पनि विभिन्न मेलापर्वहरुमा सरसामान भित्रियो, विगतका वर्षहरुभन्दा बजार क्षेत्रमा पनि चहलपहल बढेको छ,’झाले भने । यसैगरी जिल्ला प्रहरी कार्यालय बैतडीले पनि सिमानाकामा कडाइ गरेपछि राजश्व असुलीमा वृद्धि भइरहेको हो । एक महिनाको अवधिमा १० लाखबढीको भन्सार छलीका सरसामान बरामत गरेको छ ।
सिमानाकामा चेकजाँमा कडाइ गरिएको र भारतसँग सिमाना जोडिएको महाकाली नदी किनारका क्षेत्रमा पनि निगरानी बढाइएको जिल्ला प्रहरी कार्यालय बैतडीका प्रमुख प्रहरी नायव उपरिक्षक दिपक गिरीले जानकारी दिए । ‘राजश्व छलीका सरसामानहरु व्यापक रुपमा समातिएको छ,’दशरथचन्द नगरपालिका क्षेत्र र तल्लो स्वराड क्षेत्रमा पनि निगरानी बढाएका छौँ,’ प्रहरी नायव उपरीक्षक गिरीले भने । अन्नपूर्णबाट
