धनगढी- उद्योग,वाणिज्य तथा आपूर्ति मन्त्री दामोदर भण्डारीले संसद प्रतिपक्षी दलको बन्धकको रुपमा रहेको बताएका छन् ।
आज प्रेस चौतारी नेपाल,कैलालीले धनगढीमा गरेको पत्रकार सम्मेलनमा बोल्दै उनले संसद अवरुद्ध हुँदा जनताका मुद्धाले प्राथमिता पाउन नसकेको बताए ।
उनले भने ‘अहिलेका तत्कालिक विषयहरु आगलागी,वन डढेलो जस्ता थुप्रै राष्ट्रिय मुद्धाका सन्दर्भमा जनताका माग र मुद्धाले संसदमा प्राथमिकता पाउनु पर्ने हो । संसद अवरुद्ध हुँदा त्यो हुन सकेको छैन् ।’ ‘एउटा विषयलाई लिएर लामो समयदेखि संसद अवरुद्ध रहने कुरा जनता माथिको कुठाराघात हो । संसदमा जसरी अराजक शैलीमा प्रदर्शन भइरहेको छ । खासगरी नेपाली कांग्रेसले सत्ता बहिर्गमनको आक्रोस संसदमा अमर्यादित ढंगले प्रस्तुत हुने कुरा निन्दनीय छ’ उनले भने । त्यस्तै उनले सरकारले प्रस्तुत गरेको नीति तथा कार्यक्रमले धेरै आशा र सम्भावना बोकेर आएको बताए । उनले भने ‘ हामी यी आशा र सम्भावनालाई बजेटको माध्यमबाट पूरा गर्न चाहान्छौँ ।’
