धनगढी- डोटीको जोरायल गाउँपालिका–५ गडसेरा,ग्वान(साविकको गडसेरा–४ ग्वान) स्थायी घर भई हाल धनगढी उपमहानगरपालिका–४ बस्ने पूर्व शिक्षक चन्द्रबहादुर बोहराले डोटीका तीन वटा विद्यालयमा एकसाथ अक्षयकोषको स्थापना गरेका छन् ।
डोटीको जोरायल गाउँपालिका–५ खतेडास्थित महाकाली माध्यमिक विद्यालय,वडा नं. ६ दहस्थित कृष्ण मावि र खसरेस्थित केदार माविमा अक्षयकोषको स्थापना गरेका हुन् ।
बोहराले महाकाली मावि खतेडामा आफ्नी आमा नन्दादेवीको स्मृतिमा रू एक लाख एक हजार एक सय, कृष्ण मावि दहमा आफ्ना पिता जगत बोहराको नाम रहने गरि रु एक लाख एक हजार एक सय एक र केदार मावि खसरेमा बोहराकी धर्म पत्नी महेश्वरीदेवी बोहराले आफ्ना स्वर्गीय पिता काशी र माता चन्द्रादेवी बोहराको सम्झनामा ५५ हजार पाँच सय ५५ रुपैयाको अक्षयकोष स्थापना गरेको स्थानीय रविन्द्र देउवाले जानकारी दिए ।
पूर्व शिक्षक बोहरा कृष्ण मावि दहका संस्थापक पूर्व प्रधानाध्यापक समेत हुन् । विद्यालयको सर्वाङ्गिण विकासका लागि अक्षयकोष स्थापना गरिएको जनाइएको छ । बोहरा शिक्षाप्रेमी तथा शिक्षा क्षेत्रको विकासका लागि केही गरौँ भन्ने चाहाना राख्ने व्यक्ति भएको देउवाले बताए ।
