धनगढी- कैलाली भन्सार कार्यालयले लक्ष्यअनुसारको राजस्व संकलन गर्न सकेको छैन् । कार्यालयको चालु आव २०८०÷८१ को साउनदेखि जेठ मसान्तसम्मको अवधीमा राजस्व संकलन लक्ष्यमा पुग्न नसकेको हो ।
कार्यालयको चालु जेठ मसान्तसम्म १० अर्ब ५७ करोड २९ लाख राजस्व सङ्कलनको लक्ष्य रहेकोमा ७ अर्ब ३२ करोड २१ लाख अर्थात लक्ष्यको ६९ दशमलव २५ प्रतिशत मात्रैै राजस्व संकलन भएको कैलाली भन्सार कार्यालयले जनाएको छ । भन्सार कार्यालयले चालु आवका कुनै पनि महिनामा लक्ष्यअनुसारको राजस्व संकलन गर्न सकेको छैन् ।
साउनमा ७२ करोड ३५ लाख राजस्व संकलनको लक्ष्य रहेकोमा ४६ करोड ८२ लाख,भदौमा ८८ करोड ४० लाख लक्ष्य रहेकोमा ५१ करोड ९३ लाख,असोजमा ९७ करोड ८१ लाख लक्ष्य रहेकोमा ६३ करोड १४ लाख र कार्तिकमा ९७ करोड ५३ लाख लक्ष्य रहेकोमा ६१ करोड ४६ लाखमात्रै राजस्व संकलन भएको कैलाली भन्सार कार्यालयका सूचना अधिकारी पवित्रकुमार खड्काले जानकारी दिए ।
त्यस्तै, मंसिरमा १ अर्ब २ करोड २५ लाख लक्ष्य रहेकोमा ७३ करोड ३४ लाख,पुसमा १ अर्ब ४ करोड ६९ लाख लक्ष्य रहेकोमा ६८ करोड ९० लाख र माघमा ९२ करोड ६९ लाख राजस्व संकलनको लक्ष्य रहेकोमा ६६ करोड ६७ लाख राजस्व संकलन भएको जनाइएको छ ।
फागुनमा १ अर्ब ९८ लाख लक्ष्य रहेकोमा ६९ करोड एक लाख, चैतमा १ अर्ब ४७ लाख लक्ष्य रहेकोमा ७२ करोड १३ लाख,वैशाखमा ९९ करोड ८९ लाख लक्ष्य रहेकोमा ७५ करोड १७ लाख र जेठमा १ अर्ब ७५ लाख राजस्व सङ्कलनको लक्ष्य रहेकोमा ८३ करोड ५३ लाख राजस्व संकलन भएको कैलाली भन्सार कार्यालयले जनाएको छ ।
भन्सार कार्यालयको चाालु आवमा ११ अर्ब ५८ करोड २४ लाख राजस्व संकलनको वार्षिक लक्ष्य रहेको जनाइएको छ । ११ महिनामा संकलन भएको राजस्व वार्षिक लक्ष्यको ६३ दशमलव २१ प्रतिशत मात्रै रहेको छ । कार्यालयको गत आव २०७९÷८० मा १२ अर्ब ३० करोड ६६ लाख राजस्व संकलनको वार्षिक लक्ष्य रहेकोमा ८ अर्ब २९ करोड ६३ लाख मात्रै राजस्व संकलन गरेको थियो ।
