धनगढी । नेकपा (माओवादी केन्द्र)का केन्द्रीय सदस्य तथा पूर्वमुख्यमन्त्री त्रिलोचन भट्टले जनयुद्धकै कारण देशमा आमूल परिवर्तन भएको बताएका छन् ।
३० औं जनयुद्ध दिवसको अवसरमा नेकपा (माओवादी केन्द्र) र नेकपा दिपायल–सिलगढी नगर कमिटीले बिहीबार दिपायलमा आयोजना गरेको कोण सभामा बोल्दै उनले यस्तो बताएका हुन् ।
उनले भने ‘संविधान निर्माण होस्, लोकतान्त्रिक गणतन्त्र, संघीयता, धर्मनिरपेक्षता, समावेशीताको कुरा होस् या जातीय,क्षेत्रीय,वर्गीय सबैरुपबाट आज देशमा जे ऐजेन्डा स्थापित भएका छन् यी सबै माओवादीको दसवर्षे जनयुद्धबाट स्थापित भएका हुन् ।’
उनले २०५२ साल फागुन १ गते भएको आन्दोलन समग्ररुपमा परिवर्तनका लागि भएको एउटा वर्गसंघर्ष भएको बताए । उनले भने,‘त्यो जनयुद्ध जनताले आफ्नो अधिकार आफै लडेर खोसेर अधिकार लिनुपर्छ भनेर एउटा विचार सहितको आन्दोलन थियो । यो दिवसलाई हामीले महान दिनका रुपमा लिने गछौँ ।’
उनले भने ‘आजको दिन वर्ग संघर्ष सुरु भएको दिन हो । देशमा पहिले पनि कम्युनिष्ट पार्टी थिए । आन्दोलन पहिले पनि भएका थिए । यो आन्दोलन अरुभन्दा निकै फरक रह्यो ।’
पूर्वमुख्यमन्त्री भट्टले भने ‘जसरी जनयुद्धको बिषयमा चर्चा हुने गर्छ । हिजो जनयुद्ध गरेकै साथीहरुले,नेताहरुले पनि कहिले हिंसा कहिले ठिक थिएन भनिदिने गरेका छन् । म के भन्न चाहान्छु भने आफ्नो स्वार्थका लागि कसले के व्याख्या गर्छ छुट्टै कुरा हो । समग्ररुपमा जनयुद्धले स्थापित गरेका एजेण्डा,मुद्धा, आम जनताले ल्याएका आज नेपालमा स्थापित भएका छन् ।’
माओवादी केन्द्रले डोटीका सबै पालिकामा जनयुद्ध दिवस मनाएको छ ।
