धनगढी- सुदूरपश्चिम प्रदेशका आन्तरिक मामिला तथा कानुन मन्त्री पृथ्वीबहादुर सिंहले आम सञ्चार नीति संसदबाट पारित गराउने पहिलो प्रयास रहने बताएका छन् ।

नेपाल प्रेस युनियन कैलाली शाखाले आयोजना गरेको बधाई तथा सम्मान कार्यक्रममा मन्त्री सिंहले पत्रकारिता विकासका लागि नीतिगत व्यवस्था अभाव भएकाले प्राथमिकतामा रहेको बताएका हुन् ।

‘प्रेस स्वतन्त्रताको दायरालाई अझै फराकिलो बनाउन सक्ने संचार संस्था र सञ्चारकर्मीमैत्री हुनुपर्दछ भन्ने मान्यता हो’ उनले भने –‘नीतिले पत्रकारिताका सिद्धान्त र आचारसंहितालाई उल्लंघन गर्नु हुँदैन । यसका लागि सञ्चारकर्मीहरुबाट सहयोगको अपेक्षा गरेको छु ।’

मन्त्री सिंहले खुल्ला सरकार, विधिको शासन, सुशासन, पारदर्शिता र जवाफदेहितामा सरकारले विश्वास गर्ने बताए । उनले भने –‘त्यसकारण पनि मिडियाको शसक्त भुमिका हामीले खोजेका छौं । प्रदेश सरकार मिडियाको रचनात्मक सुझाव र आलोचनात्मक अपेक्षा राख्दछ ।’

उनले आफ्नो कार्यकालमा कुनै पनि बहानामा प्रेस तथा अभिव्यक्ति स्वतन्त्रता खोस्ने र खुम्च्याउने काममा नलाग्ने बताउँदै ‘मिडिया सम्बन्धी कुनै कानुन वा नीतिगत निर्णय गर्दा तपाईहरुको सुझाव सल्लाह लिएर मात्रै अगाडी बढ्ने कुरामा ढुक्क हुन आग्रह गर्दछु ।’

उनले केही समय अगाडि एक युट्वमा एक विश्लेषक भन्ने व्यक्तिले काल्पनिक घटना बनाएर अभिव्यक्ति दिएको कुरा भ्रामक र झुठ रहेको बताए । उनले भने –‘गलत, भ्रामक सूचना, अभिव्यक्तिहरुको खण्ड्न गर्दै समाजमा सत्यतथ्य र विश्वसनिय जानकारी दिन पनि आम सञ्चारमाध्यमको महत्वपूर्ण भुमिका रहन्छ ।’
बझाङको माझा गाउँमा अमेरिकी सेना रहेको र त्यहाँ काँग्रेसका नेताहरुले संरक्षण गरेको भन्ने अभिव्यक्ति गलत रहेको उनले बताए ।

नेपाली काँग्रेस कैलाली सभापति नारायणदत्त भट्टले सञ्चारमाध्यमले जिम्मेवार भएर समाचार सम्प्रेषण तथा प्रशारण गर्न जरुरी रहेको बताए । उनले भने –‘आफना समाचार बजारमा विकाउ गर्ने उद्देश्यले अहिले भ्रामक समाचार पनि प्रकाशन भइरहेका छन् ।

यस्ता प्रवृतिबाट सञ्चारमाध्यम निष्पक्ष बन्न जरुरी छ ।’ उनले प्रवृतिमा सुधार नभएसम्म जो मन्त्री बनेपनि केही नहुने बताए । उनले सञ्चारकर्मीसंग अनुरोध गर्दै भने –‘समिक्षा गर्नुहोस् । विस्तृत बुझनुहोस् । अनिमात्र समाचार सम्प्रेषण तथा प्रशारण गर्ने काम गर्नुहोस् ।’

नेपाल प्रेस युनियन कैलालीका अध्यक्ष श्रवण देउवाको अध्यक्षतामा भएको कार्यक्रममा नेपाल पत्रकार महासंघका केन्द्रिय सदस्य भरत शाह, नेपाल प्रेस युनियन सुदूरपश्चिम प्रदेश उपाध्यक्ष टेकेन्द्र देउवा लगायतले मन्तव्य व्यक्त गरे । नेपाल प्रेस युनियन कैलालीका कोषाध्यक्ष सुनिल आउजीले स्वागत गरेको कार्यक्रमको सञ्चालन सचिव सिताराम ओझाले गरेका थिए ।