धनगढी । कञ्चनपुरबाट हतियारसहित चार जना भारतीय नागरिक पक्राउ परेका छन् ।
भारतीय नागरिकले चलाएको गाडीमा हातहतियार बोकेको भन्ने गोप्य सूचनाको आधारमा जिल्ला प्रहरी कार्यालय कञ्चनपुरबाट प्रहरी उपरीक्षक चक्रराज जोशीको कमाण्डमा खटिएको प्रहरी टोलीले खोजतलाश गर्दा गएराति ९ः४५ बजे चारै जनालाई पेस्तोलसहित पक्राउ गरिएको सुदूरपश्चिम प्रदेश कार्यालय धनगढीले जनाएको छ ।
भीमदत्त नगरपालिका-६ ऐठपुरबाट पूर्व-पश्चिम राजमार्गमा महेन्द्रनगरबाट पश्चिम गड्डाचौकी तर्फ गइरहेको चालक भारतको उधमसिंहनगर जिल्ला, ग्राम खटिमा बस्ने ३४ वर्षीय जिवन सिंह जिमेवालले चलाई रहेको युके ०६ एआर ०८४६ नम्बरको कारलाई चेकजाँच गर्दा कारको चालक सिट पछाडीको खल्तीमा लुकाई छिपाई राखेको Made by ATAK arms ltd for “J.G.S.” cal. 9mm P.A.K JORAKI MOD.914, 0615-007619 लेखिएको म्याग्जिन, कभर सहितको पेस्तोल जस्तो देखिने हतियार १ थान फेला परेको प्रहरीले जनाएको छ ।
हतियारसहित कारमा सवार भारतको उधमसिंहनगर जिल्ला, ग्राम खटिमा बस्ने ३१ वर्षीय कोमल बिष्ट, ३४ वर्षीय उमेदसिंह अधिकारी र २८ वर्षीय संजय जेठी समेतलाई नियन्त्रणमा लिइ सो सम्बन्धमा प्रहरीले थप अनुसन्धान गरिरहेको जनाएको छ ।
