धनगढी । सुदूरपश्चिम प्रदेशका मुख्यमन्त्री कमलबहादुर शाहले मानवसेवा आश्रमले अगाडि बढाएका काम अत्यन्त सह्रानीय भएको बताएका छन् ।
मानवसेवा आश्रमको आयोजनामा धनगढीमा आजबाट सुरु भएको श्रीमद् भागवत सप्ताह ज्ञानविज्ञान महायज्ञको उद्घाटन कार्यक्रममा बोल्दै उनले यस्तो बताएका हुन् ।
उनले भने ‘मानव सेवा आश्रमले जसको कोही छैन् त्यस्ता व्यक्तिलाई खाना,नाना,छाना दिने कार्य अगाडि बढाएको छ । त्यसमा हामी खुशी पनि छौँ । यस्ता सत्कर्ममा लाग्ने समाजका विभिन्न व्यक्ति,संस्थालाई राज्यले हातेमालो गर्दै अगाडि बढ्नुपर्छ भन्ने सुदूरपश्चिम प्रदेश सरकारको मान्यता छ ।’
मुख्यमन्त्री शाहले सत्कर्ममा लाग्ने व्यक्ति संस्थालाई राज्यले पनि सहयोग गर्नुपर्छ भन्ने मान्यता आफ्नो रहेको बताए । उनले भने ‘राम्रो काममा लाग्ने सबै क्षेत्रको विकासका लागि हामी हाम्रो तर्फबाट सहयोग गर्ने प्रतिवद्धता व्यक्त गर्न चाहान्छु ।’
उनले भने ‘मानवसेवा आश्रमले महायज्ञको थालनी गरेर दिन दुःखीहरुलाई,जसको साहरा छैन् उनीहरुलाई र विशेष गरी बृद्धबृद्धालाई एउटा व्यवस्थापन गर्ने, खाना,नाना,छानासँगै औषधी उपचार र साहरा दिने सत्कर्मका साथ महायज्ञ सुरु भएको छ यसको पूर्ण सफलताको शुभकामना व्यक्त गर्दछु ।’
आश्रमको धनगढी उपमहानगरपालिका–१५ उर्मीमा निर्माण सुरु भएको भवन सम्पन्न गर्नका लागि आर्थिक संकलन र सद्भावनाका लागि महायज्ञ आयोजना गरिएको आश्रमले जनाएको छ । धनगढीको उपमहानगरपालिका–१ पशुपति टोलस्थित महोत्सव स्थलमा सुरु भएको महायज्ञ यही माघ ३० गतेसम्म सञ्चालन हुने आयोजकले जनाएको छ ।
