कञ्चनपुर । पहिला दिनभर मजदुरी गरेर ५०० भन्दा बढी ज्याला नपाउने वेदकोट नगरपालिका-५ धरपुरकी पार्वती डगौरा अचेल दैनिक एक हजार रुपैयाँ आम्दानी गर्न थालेकी छिन्। घर तथा विभिन्न संरचना निर्माणमा पुरुषसरह मजदुरी गर्दा पनि महिला भएकाले ज्याला कम पाउन थालेपछि पार्वतीले घर मिस्त्रीको काम सिकिन्।
‘दिनभर पुरुषसरह मजदूरी गर्दा पनि ज्याला कम पाउन थालेपछि आफैँ मिस्त्रीको काम गर्ने र घर निर्माणको ठेक्का लिने योजना बनाएँ’, उनले भनिन्, ‘दातृ निकायको सहयोगमा मैले वडा कार्यालयमा राज मिस्त्रीको तालिम लिएँ।’ उनले वडा कार्यालय र निड्स नेपाल कञ्चनपुरको दिगो आम्दानी तथा महिला सशक्तीकरण परियोजनाको सहयोगमा ६० दिने राज मिस्त्रीको तालिम लिएको बताइन्।
‘शरुमा मजदुरी गर्थेँ। दिनको ५०० रुपैयाँ मात्रै ज्याला पाउँथे। अहिले आफैँ घर निर्माणको ठेक्का लिन थालेकी छु”, डगौराले भनिन्, ‘अहिले मिस्त्रीको काम गर्दा पनि दैनिक एक हजार आम्दानी हुन्छ।’ मिस्त्रीको तालिम सकिनेबित्तिकै गाउँमा एउटा घर निर्माणको ठेक्का मिलेको उनले बताइन्।
पार्वतीले गाउँमै तीन वटा घरको ठेक्का लिएर निर्माण पूरा गरिसकेकी छिन्। एउटा घरको काम नसकिँदै अर्को घरको ठेक्का पाएको उनले बताइन्। ‘अहिले धेरै सजिलो भएको छ ठेक्का पाइराखिएको छ’, उनले भनिन्।
ज्यालामा हुने विभेदले आफूलाई पिरोलेको र मिस्त्रीको तालिम लिएको उनले बताइन्। ‘यहाँ ज्यालामा धेरै विभेद छ, एउटै कामको ज्यादा पुरुषलाई बढी छ महिलालाई कम दिइन्छ’, उनले भनिन्, ‘यो विभेद अन्त्य गर्नका लागि पनि मैले हिम्मत गरेर तालिम लिएर आफैँ घर निर्माणको ठेक्का लिन थालेकी हुँ।’
निड्स नेपाल कञ्चनपुरले दिगो आम्दानी तथा महिला सशक्तीकरण परियोजनाअन्तर्गत कञ्चनपुरको वेदकोट र कृष्णपुर नगरपालिकामा परियोजना सञ्चालन गरेको छ। परियोजनाअन्तर्गत महिलाको आयआर्जनमा सुधार क्षमता विकासका लागि तालिम र उनीहरूको आश्वयकता अनुसारको उद्यममा सहयोग गरेको परियोजना संयोजक हेमन्त शाहीले बताए। वेदकोट नगरपालिका-४ का वडाध्यक्ष नरेन्द्रबहादुर बोहराले केही गर्न चाहने महिला आत्मनिर्भर बन्न सहयोग पुगेको बताए। रासस
