धनगढी । धनगढीस्थित सेती प्रादेशिक अस्पतालमा केही हप्तादेखि अवरुद्ध सिटी स्क्यान सेवा सुचारु भएको छ।
सिटी स्क्यान मेसिनमा आएको प्राविधिक समस्याका कारण अवरुद्ध सेवा सोमबारबाट सञ्चालनमा आएको अस्पताल प्रशासनले जनाएको छ ।
अस्पताल प्रशासनले सूचना जारी गर्दै मेसिनमा देखिएको समस्या सम्बन्धित कम्पनीका इन्जिनियरले मर्मतसम्भार गरेपछि सेवा नियमित रूपमा सञ्चालनमा आएको जनाएको छ।
सिटी स्क्यान सेवा बन्द हुँदा प्रदेशका विभिन्न जिल्लाबाट उपचारका लागि आउने बिरामी प्रभावित भएका भएका थिए ।
अस्पतालमा दैनिक करिब २० जनाले सिटी स्क्यान सेवा लिँदै आएका थिए । सेवा बन्द हुँदा उपचारका लागि अस्पताल पुग्ने बिरामीले थप आर्थिक भार व्यहोर्नुपरेको थियो ।
जीई कम्पनीको सिटी स्क्यान मेसिनको पार्टपुर्जा बिग्रिएपछि सेवा सञ्चालनमा समस्या आएको थियो ।
सेती प्रादेशिक अस्पतालमा २०७९ साल पुसदेखि सिटी स्क्यान सेवा सञ्चालनमा आएको हो । अस्पतालमा उपलब्ध यो सेवा विशेषगरी जटिल स्वास्थ्य समस्या पहिचान र उपचारका लागि महत्वपूर्ण मानिन्छ ।
