धनगढी- सुदूरपश्चिम प्रदेशका सामाजिक विकास मन्त्री झपटबहादुर साउदले युवाहरुलाई पहिलो प्राथमिकतामा राखेर प्रदेश सरकारले नीति तथा कार्यक्रम ल्याउने बताएका छन् । आइतबार युवालय नामक संस्थाको आयोजनामा धनगढीमा सञ्चालित प्रादेशिक नीति संवाद तथा युवा महोत्सवको उद्घाटन कार्यक्रममा बोल्दै मन्त्री साउदले यस्तो बताएका हुन् ।
‘अहिले प्रदेश सरकार नीति, कार्यक्रम र बजेटको पूर्वसन्ध्यामा छ, नीति कार्यक्रम यूवालाई पहिलो प्राथमिकतामा राखेर ल्याउने छ,त्यही किसिमले बजेट विनियोजन गरिने छ’, उनले भने ‘किन भने युवाहरुलाई देश निर्माणमा अगाडि बढाउन सकिएन भने देशको विकास हुन सक्दैन भन्नेमा सरकार विश्वस्त छ ।’
मन्त्री साउदले युवाहरुलाई राहदानी नभएर रोजगारी दिनुपर्ने बताए । उनले भने, ‘युवाहरुले रोजगारीका लागि विदेशिनु पर्ने बाध्यता छ, अहिलेको भोली भन्ने कुरा हुँदैन तर यहाँको स्रोत साधनलाई सही ढंगबाट सदुपयोग गर्न सक्यौँ भने रोजगारीको सिर्जना यहीँ गर्न सकिन्छ ।’
‘हामीसँग अथाह पर्यटकीय क्षेत्र छन्,पर्याप्त जडिबुटी छन्’, उनले भने, ‘यसलाई प्रदेश सरकारले सही ढंगबाट सदुपयोग गर्ने हो भने प्रदेश भित्र रोजगारीको व्यवस्था गर्न सकिन्छ,हामी त्यो नीति कार्यक्रम र बजेटको व्यवस्था गर्ने तयारीमा छौँ ।’
तत्कालिन राज्य सत्ताका नीतिका कारण सुदूरपश्चिम प्रदेश पछाडि पारिएको बताउँदै उनले भने, ‘बिगतका राज्यसत्ताले बनाएका ऐन कनून, नियमले पछाडि पारिएको क्षेत्र हो ।’ त्यस्तै कार्यक्रममा बोल्दै युवा प्रतिनिधि निर्मला टेरले युवालाई सैद्धान्तिक भन्दा व्यवहारिक शिक्षामा जोड दिनुपर्ने बताइन् ।
उनले भनिन्, ‘युवालाई रोजगारी सिर्जना गर्न व्यवहारिक सीपको आवश्यक छ, कृषि क्षेत्रमा लागेका युवालाई तालिमको व्यवस्था गरिनु पर्छ, युवालाई उद्यमी बनाउनु पर्छ ।’ त्यस्तै छुवाछूत, बालबिबाह जस्ता समस्या समाधान गर्नुपर्नेमा उनले जोड दिइन् ।
त्यस्तै समाज कल्याण परिषदका कोषाध्यक्ष बिनय लामाले देशको विकास समृद्धिको कुरा गर्दा समाजमा रहेको सामाजिक असमावेशिकरणलाई पनि ध्यान दिनुपर्ने बताए । लामाले युवालाई विदेश पलायनबाट रोक्न सके विकास सम्भव हुने र युवा नीति समय सापेक्ष बनाउनु पर्नेमा जोड दिए ।
युवालय नामक संस्थाका अध्यक्ष सन्तोष महर्जनले युवाहरु जोश मात्र नभई होस भएका युवा भएको बताए । ‘हामी युवाहरुलाई जोश भएका युवा भन्छौँ, हामी जोशसँगै होश भएका युवा हौँ, होश गुमाएका युवा होइनौँ,’ उनले भने । उनले युवाहरुमा जोश र होश दुबै भएकाले युवाहरुले आफ्नो उर्जाको प्रयोग सही ठाउँमा गर्नुपर्ने बताएका छन् ।
उनले अहिले नीति तथा कार्यक्रम बन्ने चरणमा रहेको बताउँदै यो भेला युवाहरुका लागि एक अवसर पनि भएको बताए । महर्जनले आजको छलफललाई उपलब्धीमूलक बनाउनुपर्नेमा पनि जोड दिए । अहिले नीति तथा कार्यक्रममा युवाका कुराहरु समेट्न सके पछि गएर आफूहरुले आफ्ना समस्या राख्न ढोका घच्घच्याउनु नपर्ने उनको भनाइ थियो ।
कार्यक्रममा प्रदेशका ९ वटै जिल्लाबाट युवाहरुको सहभागिता रहेको छ । सोमबारसम्म सञ्चालन हुने महोत्सवमा युवाका मुद्धा कसरी उजागर गर्ने, युवा विदेशिनु पर्ने समस्या समाधान कसरी गर्नेलगायतका विषयमा छलफल हुने आयोजकले जनाएको छ ।
