धनगढी- सुदूरपश्चिमका उद्योग, पर्यटन, वन तथा वातावरणमन्त्री रमेश धामीले प्रादेशिक नीति संवाद तथा युवा महोत्सवको सन्देश गाउँ–गाउँमा पुग्ने विश्वास व्यक्त गरेका छन् ।
दुई दिने युवा महोत्सवको समापन कार्यक्रममा मन्त्री धामीले युवालाई विदेश जाने सपना अन्त्य गरेर सुदूरपश्चिम प्रदेश बनाउने जिम्मा लिनुपर्ने बताए । उनले जल, धार्मिक पर्यटन, जंगल, जमिन उपयोग गरेर युवालाई रोजगारीमा समेटेर प्रदेश सरकार अघि बढ्ने बताए । आफ्नो मन्त्रालय युवामैत्री हुने बताउँदै विदेशमा रहेका युवालाई समेत स्वदेश फर्काउने वातावरण बनाउन उनले आग्रह गरे ।
युवा उधमशिलता, सुरक्षित वैदेशिक रोजगारी, सीप तथा अवसर, गलत वा मिथ्या सूचना, दुष्प्रचार तथा घृणास्पद अभिव्यक्ति, यौन तथा प्रजनन् स्वाथ्यबारे विज्ञहरुद्वारा अभिमुखीकरण भएको थियो । कार्यक्रममा नेपालको जनसंख्याको ४२.५ प्रतिशत जनसंख्या १६ देखि ४० वर्षसम्मका युवाको रहेको उल्लेख गर्दे उनीहरुको क्षमता अभिबृद्धि र राष्ट्र निर्माणको मुल प्रवाहिकरणमा समाहित गर्नुपर्ने माग राखेर २१ बुँदे धनगढी घोषणपत्र जारी गरिएको छ ।
घोषणापत्रमा युवाको संस्थागत रुपमा नै समग्र विकासका निमित्त उचित व्यवस्था गर्ने, यसका लागि प्रदेश युवा परिषद् तथा स्थानीय तहमा पालिकास्तरीय युवा परिषद्को गठन गर्न, प्रदेश युवा नीति निर्माण गर्न, प्रदेशका सिमान्तकृत समुदायमा रहेका दलित समुदाय, अपाङ्गतामा रहेका युवा, मुस्लिम, मुक्त कमैया, मुक्त कम्लहरी तथा यौनिक तथा लैंगिक अल्पसंख्यक समुदायबाट प्रतिनिधित्व गर्ने युवालगायतका समूहलाई लक्षित गर्दै उच्च शिक्षा तथा प्राविधिक शिक्षाको निःशुल्क व्यवस्था गरेर रोजगारीको सुनिश्चितता गर्ने बताइएको छ । युवालयका अध्यक्ष सन्तोष महर्जनको अध्यक्षतामा भएको कार्यक्रममा गैरसरकारी संस्था महासंघका केन्द्रीय सदस्य किरण थापालगायतले बोलेका थिए ।
